Sý resýrstary jáne ırrıgasıa mınıstrliginiń baseındik ınspeksıalary ótken jyly sý zańnamasynyń talaptaryn saqtaý boıynsha 64 tekseris júrgizdi.
Nátıjesinde, 129 buzýshylyq anyqtaldy. Atap aıtqanda, sý obektilerin zańsyz basyp alý, ruqsat etilgen kólemnen artyq sý alý, sý sharýashylyǵy qurylystary paıdalaný erejelerin buzý, zańsyz sý uńǵymalaryn burǵylaý jáne jerasty sýlaryn alý qurylystaryn salý, sýdy bastapqy esepke alý tártibin buzý jáne esepke alý derekterin burmalaý syndy birqatar buzýshylyqtar tirkeldi.
Anyqtalǵan buzýshylyqtardy joıý boıynsha 56 uıǵarym berilip, 63 ákimshilik is sotqa jiberildi. Búgingi kúnge sý zańnamasyn buzǵandardan 11 mln teńgeden astam qarajat óndirildi.
Elimizde sý resýrstaryn qorǵaý máselesi óte ózekti. Sýdyń «qara naryǵyn» joıý jáne onyń shyǵynyn baqylaýdy qamtamasyz etý úshin Sý resýrstary jáne ırrıgasıa mınıstrligi baseındik ınspeksıa shtatyn 1,5 ese kóbeıtti. Eger buryn baseındik ınspeksıa qyzmetkerleriniń sany 98 adam bolsa, qazir jalpy shtat sany 242 adam. Budan bólek, jańa Sý kodeksinde baseındik ınspeksıalarǵa qadaǵalaý fýnksıalaryn da berý kózdelgen. Al kásipkerlik kodeks sý resýrstaryn basqarý organdary jedel den qoıý sharalaryn qabyldaı alatyn normalarmen tolyqtyrylatyn bolady.