Almatyda «Biryńǵaı beınemonıtorıng júıesine» qosylǵan beınekameralar sany 30%-ǵa derlik artady
Búginde Almatyda «Almaty – Smart-sıtı» tujyrymdamasy aıasynda Sıngapýr, Shanhaı, Shenchjen syndy megapolısterge uqsas qalanyń «sıfrlyq egizin» iske asyrýǵa negiz bolatyn úlken derekterdi jınaý men taldaý úshin Almaty qalasynyń Ahýaldyq ortalyǵy jobasy júzege asyrylyp jatyr.
Almaty qalasynyń Ahýaldyq ortalyǵy qala tirshiliginiń barlyq salasyndaǵy derekterdi jınaýǵa, taldaýǵa, halyqqa aqparat berýge jáne qala bıliginiń turǵyndardan keri baılanys alýǵa múmkindik beretin 53 modýlden turady.
Almaty qalasynyń Ahýaldyq ortalyǵynyń maqsaty senimdi ári ózekti derekter negizinde qalanyń áleýmettik-ekonomıkalyq prosesin baqylaý, taldaý, josparlaý, ony keıinnen vızýalızasıalaý úshin biryńǵaı aqparattyq-taldamalyq keńistik qurý.
Derekter 50-den astam uıymnan, sondaı-aq, memlekettik jáne qalalyq aqparattyq júıelerden (Ulttyq statısıka búrosynyń saıty, «Qylmystyq quqyq buzýshylyq kartasy», «109-qyzmet», «Biryńǵaı beıne monıtorıń júıesi», «Sergek», «Ońaı», Metropolıten, TJD jáne t.b.) jınalady.
2022 jyldyń tamyzynan bastap Almatyda «Biryńǵaı beınemonıtorıng júıesi» jobasy qolǵa alynǵan, onyń basty mindeti naqty ýaqyt rejıminde beıne analıtıka qalyptastyrý úshin qaladaǵy barlyq beınebaqylaý kamerasyn biryńǵaı platformaǵa biriktirý.
«Biryńǵaı beınemonıtorıng júıesi» jobasy aıasynda qazir shaharda barlyǵy 38 854 beınekamera ornatylǵan, al 2024 jyldyń sońyna qaraı qosylǵan kamera sanyn 50 000-ǵa deıin jetkizý, ıaǵnı 30%-ǵa derlik arttyrý josparlanyp otyr.
Buǵan qosa, 2023 jyly Almatyda alǵash ret barlyq memlekettik mektep men balabaqshada keshendi qaýipsizdik júıesi engizildi. Júıe 4 quramdas bólikten turady:
- sıfrlyq beınebaqylaý kameralary,
- dabyl túımeleri,
- órtke qarsy qaýipsizdik júıeleri,
- Face ID qondyrǵysy bar arnaıy týrnıketter.
2024 jyldyń sońyna qaraı júıemen qalanyń barlyq memlekettik densaýlyq saqtaý nysany qamtylady.
Aıta ketetin nárse, arqyndy damýshy ozyq tehnologıalardy engizý derekterdi únemi jańartyp otyrýdy, tájirıbe almasýdy talap etedi. 2024 jyldyń naýryz aıynda Almaty qalasy ákimdiginiń delegasıasy sıfrlyq tehnologıa salasynda kósh bastap turǵan Qytaıdyń Shenchjen qalasyna jumys saparymen bardy.
Sapar aıasynda delegasıa «Shenchjen qalasynyń derekterdi basqarý jáne memlekettik qyzmetter búrosyna», Shenchjendiń «Aqyldy qala» tehnologıalardy damytý tobynyń Data-habyna, sonymen birge, Longen aýdanyndaǵy Jedel den qoıý ortalyǵyna at basyn burdy. Bul ortalyqtarda jasandy ıntellekt elementterin qoldanyp, barlyq baǵytty belsendi damytý úshin beınebaqylaý kameralary, zattar ınterneti dachıkteri (IoT) jáne geo-keńistiktik derekter qoldanylady.
Ákimdik ókilderine sıfrlyq egizdi qala qurylysyna, ınjenerlik ınfraqurylym men kólik salasynda qoldanýdyń naqty mysaldary kórsetildi. Derekterdi jınaý jáne taldaý, modeldeý men vızýalızasıa jáne basqarý júıelerimen biriktirý qosqanda, «sıfrlyq egizdi» qurý men qoldanýdyń tehnıkalyq aspektileri kórsetildi.
Buǵan qosa, delegasıa «aqyldy qalalar» salasyndaǵy ozyq sheshimdi zertteý úshin «Inspur», «Tencent», «Huawei» kompanıasynyń ókilderimen kezdesti. Almaty ákimdiginiń delegasıasy Shanhaıda qalanyń sıfrlyq egiz tehnologıasyna mamandanǵan «51WORLD» kásipornynyń ókilderimen júzdesti.
«Sıfrlyq egizdi» qurýǵa arnalǵan ozyq tehnıkalyq quraldardy qoldanýdy kórsetý, osy saladaǵy óndirýshi kóshbasshylarmen dıalog ornatý «Almatynyń sıfrlyq» damýyna serpin beredi.
Sonymen qatar, Almatydan barǵan delegasıa qatty turmystyq qaldyqtardy qaıta óńdeý zaýytynyń (Waste to Energy Plant) da jumysymen tanysty.
Aqyldy qalalar salasynda tájirıbe almasý úshin 2024 jyldyń ekinshi toqsanynda Almatyǵa Shenchjennen delegasıa saparmen kelýdi kózdep otyr.