Bul týraly Óńirlik komýnıkasıalar qyzmetiniń alańynda Batys Qazaqstan oblystyq kameralyq orkestriniń dırektory Saltanat Ábilǵazıeva men basqa da ártister aıtty.
Orkestr ujymy 6 qazanda Qurmanǵazy atyndaǵy Qazaq memlekettik akademıalyq halyq aspaptar orkestriniń konsert zalynda óner kórsetedi.
«6 qazanda Qurmanǵazy orkestriniń sahnasynda «Alataýǵa Aqjaıyqtan sálem» atty konsertimiz ótedi. Bizdiń orkestr áıgili mýzykant, skrıpkashy Marat Bısenǵalıevtiń bastamasymen quryldy jáne 2011 jylǵa deıin «Marat Bısenǵalıevtiń fılarmonıalyq orkestri» dep ataldy. Bizdiń orkestr 10 jyl ishinde aıtarlyqtaı jetistikterge jetti. Sahnada bizdiń jerles ártister de óner kórsetedi, olar: QR Eńbek sińirgen qaıratkeri Dına Hamzına jáne halyqaralyq baıqaýlardyń laýreaty Farhat Kóbeev jáne basqalar», - dep atap ótti S.Ábilǵazıeva.
Orkestrdiń repertýary negizinen baroko kezeńiniń klasıkalyq shyǵarmalarynan turady. Degenmen, orkestr ujymy ártúrli janrlarmen tájirıbe jasap júr: konsertte kórermender dástúrli fólklorlyq mýzykany da, zamanaýı kompozısıalardy da tyńdaı alady.
«Bizdiń orkestrdiń qurylǵanyna 10 jyldan asty jáne osy ýaqyt ishinde biz óz tyńdaýshylarymyz ben jankúıerlerimizdi jınadyq. Ujym Oral qalasynyń ártisterinen, mýzykanttardyń kópshiligi jergilikti mýzyka kolejiniń túlekterinen turady. Repertýarǵa keletin bolsaq, bizdiń orkestr negizinen klasıkalyq, akademıalyq mýzykany nasıhattaıdy. Sonymen qatar, biz kollaborasıa jasaımyz, túrli aspaptar - ulttyq, zamanaýı estradalyq aspaptardy qosamyz, osylaısha kameralyq orkestrimiz jańasha sıpatqa ıe bolady», - dedi Batys Qazaqstan oblystyq kameralyq orkestriniń kórkemdik jetekshisi Asqat Hasanov.
Batys Qazaqstan oblystyq kameralyq orkestriniń ujymynda 25 adam bar.
«Biz kameralyq qurammen keldik. Bizdiń quramda gıtara, bas-gıtara, urmaly aspaptar, úrmeli top, aǵash aspaptar da bar. Bizdiń konsertte barlyǵyn asyǵa kútemiz», - dep bólisti kameralyq orkestr ártisi Elena Shýtareva.
Orkestr mundaı gastróldik týrlar jańa serpin men tynys beretinin, sondaı-aq mýzykanttardyń kásibıligin arttyratynyn atap ótti. Orkestr halyqaralyq sahnalarda óner kórsetý jáne qazaqstandyq mýzykany sheteldik aýdıtorıaǵa tanystyrýdy josparlap otyr.
Aıta ketý kerek, orkestrdiń gastróldik týry Astanada 10 qazanda jalǵasady.