Qazirgi ýaqytta 13460 almatylyq jumyssyz retinde tirkelgen.
Qalalyq jumyspen qamtý ortalyǵy turaqty túrde bos jumys oryndary jármeńkesin ótkizip turady. Jyl basynan beri 28 bos jumys oryndary jármeńkesi ótkizilip, oǵan 8 myńnan astam adam qatysqan, onyń ishinde 1000-ǵa jýyq adam jumysqa ornalastyryldy.
Almaty turǵyndaryn jumyspen qamtý maqsatynda «Jastar tájirıbesi», «Birinshi jumys orny», «Kúmis jas» jobasy júzege asyrylyp jatyr.
«Jastar tájirıbesi 29 jastan asqan bilim berý uıymdarynyń túlekteri arasynan alǵan mamandyǵy boıynsha jumys ótili 12 aıdan aspaıtyn jumyssyzdarǵa arnalǵan. Eńbekaqyny Jumyspen qamtý ortalyǵy tóleıdi. Bul 122 520 teńge. 2022 jyly 1000 adamdy qamtý kózdelgen», - dedi Almaty qalalyq Jumyspen qamtý ortalyǵynyń dırektory.
Aıta keteıik, Jastar tájirıbesiniń erekshelikteriniń biri - qatysýshynyń jalaqysyn aı saıyn memleket tólep otyrady. Al bıyl jobaǵa qatysýshylardyń jalaqysy ósti. 2021 jyly jalaqy 35 AEK (102 095 teńge) bolsa, osy jyly 40 AEK (122 520 teńge) jetti. Jalaqyny jumyspen qamtý ortalyǵy aı saıyn turaqty túrde tólep otyrady. Zeınetaqysy men saqtandyrýy qosa júredi. Eger jumys berýshi bólek eńbekaqy tóleımin dese, oǵan da ruqsat etilgen.
Baǵdarlamaǵa qatysqysy kelgen azamat Jumyspen qamtý ortalyǵyna baryp tirkelip, ótinish berýi kerek. Ortalyq mamandary qatysýdyń sharttaryn, qandaı jumys oryndary baryn, baǵdarlama erejelerin túsindiredi. Baǵdarlama arqyly memlekettik qyzmetten bastap jekemenshik kompanıalar men zaýyttarǵa deıin jumysqa ornalasýǵa bolady. Sondaı-aq qatysýshy qaı mekemede taǵylymdamadan ótkisi keletinin aıtyp, ótinish bildire alady. Baǵdarlama búkil Qazaqstandy qamtıdy.
Almaty qalasy jumyspen qamtý ortalyǵynyń málimetinshe, óńirde 2021 jyly jastar praktıkasyna 1 491 adam jiberilip, onyń 537-si jumysqa qabyldanǵan. Al 2022 jyly qazirgi kezeń boıynsha jastar praktıkasymen 279 jumys istep júr.
Sonymen qatar «Meniń alǵashqy jumys ornym» jobasy da eńbek tájirıbesi joq jastar úshin jasalǵan úlken múmkindik bolyp otyr.
«Qazirgi ýaqytta oqý oryndaryn bitirgen túlekter úshin jastar tájirıbesi aıtarlyqtaı qoldaý bolyp tur. Olardy eńbek ótili bolmaǵandyqtan jumysqa almaıdy. Sondyqtan 29 jasqa deıingi jastarǵa, onyń ishinde eńbek ótili joq NEET sanatyndaǵy jastarǵa 18 aıdan aspaıtyn merzimge ýaqytsha jumys oryndaryn qurýdy kózdeıtin «Meniń alǵashqy jumys ornym» jobasy iske qosyldy. Munda da eńbekaqy jumyspen qamtý ortalyǵy arqyly tólenedi. 30 AEK nemese 91 980 teńge»,- deıdi Almaty qalalyq Jumyspen qamtý ortalyǵynyń dırektory.
Al qalamyzda ashylǵan «Urpaqtar úndestigi» jobasy 2 jyl ishinde oqýyn aıaqtaǵan, jasy 29-dan aspaǵan bilim berý uıymdarynyń túlekterine 6 aıdan aspaıtyn merzimge ýaqytsha jumys oryndaryn ashady.
«Almatylyqtardyń aǵa býynyna keletin bolsaq, olar úshin «Kúmis dáýir» jobasy bar. Ol zeınetkerlik jastaǵy jumyssyzdar úshin 12 aıdan aspaıtyn merzimge ýaqytsha jumys oryndaryn qurýdy kózdeıdi. Jalaqynyń bir bóligin Jumyspen qamtý ortalyǵy óteıdi (eńbekaqydan 50%, biraq 30 AEK-ten aspaıdy). 2022 jyly 633 adamdy jumyspen qamtý josparlanýda, qazirgi ýaqytta jumys berýshiler tizimi jasalýda»,- dedi Dılára Imanqulova.
Búgingi kúni 13460 almatylyq turǵyn jumyssyz retinde tirkelgen.
Al qaladaǵy jumyssyzdardyń jumysqa ornalasýda qalaı kómek ala alatyny, olarǵa básekege qabiletti túıindeme jasaýǵa jáne laıyqty bos jumys ornyn tabýǵa qaıda kómek kórsetiletini týraly Almaty qalalyq Jumyspen qamtý ortalyǵynyń dırektory Saǵyndyq Kenjebaev baıandady.
Onyń aıtýynsha, bıylǵy jyly25 221 adam jumysqa ornalasqan.
Spıkerdiń aıtýynsha, búgingi kúni jumys berýshiler elektrondy eńbek bırjasyna 4306-dan astam bos jumys oryndaryn ornalastyrǵan. Aǵymdaǵy jyldyń basynan beri 25 221 adam jumysqa ornalassa, onyń 13 343-i turaqty, 11 878-i ýaqytsha jumysqa ornalastyryldy.
«Azamattar men jumys berýshilerge yńǵaıly bolý úshin 2018 jyldan bastap qyzmetterdi elektrondy formatqa kóshirýdi júzege asyrý bastaldy. Búgingi kúni barlyq qyzmetter onlaın túrde kórsetiledi, bul ótinish berýshini jumyssyz retinde tirkeý jáne jumysqa ornalasýǵa járdemdesýdiń belsendi sharalaryna joldama alý, jumys berýshi úshin bul bos jumys oryndaryn jarıalaý, kadrlardy irikteý, belsendi sharalarǵa qatysýǵa ótinish berý, ár túrli qujattardy usyný. jumyspen qamtý týraly esep berý», – deıdi S.Kenjebaev.
Jumyspen qamtý ortalyǵynyń dırektorynyń aıtýynsha, aǵymdaǵy jyldyń 3 qazanynan bastap 2023 jylǵa arnalǵan sýbsıdıalanatyn jumys oryndaryna qatysqysy keletin jumys berýshilerdiń ótinishterin qabyldaý bastalǵan. Sondaı-aq spıker azamattardyń jekelegen sanattaryn kvota boıynsha jumys oryndaryna (kvota boıynsha múgedekter – 2171, turaqty jumys oryndaryna – 223, probasıa qyzmeti men bas bostandyǵynan aıyrý oryndarynda esepte turǵandar – 23, jetim balalar – 2, áıelder – 12815 , jastar – 8768, alıment boıynsha bereshegi bar azamattar – 15) jumysqa ornalastyrýǵa erekshe kóńil bólinetinin aıtty.
«Jumys izdeýshilerdi tartý maqsatynda Jumyspen qamtý ortalyǵynyń qyzmetkerleri jastar resýrstyq ortalyqtarymen birlesip stıhıalyq «eńbek bırjalarynda», bazarlarda, halyq kóp jınalatyn oryndarda, jumyspen qamtýǵa járdemdesýdiń sharalary boıynsha túsindirý jumystaryn júrgizdi. Atap aıtqanda, «Altyn Orda» ámbebap bazary aýdanyndaǵy «Barlyq», «Baraholka», «Sary Arqa», Sholohov kóshesi boıyndaǵy «Almaty 1» sıaqty bazarlar qamtyldy», – dedi S.Kenjebaev.
Kezdesýler barysynda jumys izdeýshilerge kásiptik baǵdar berý jumystary júrgiziledi, bos turǵan jumys oryndary usynyldy, Kásipkerlikti damytýdyń ulttyq jobasyna qatysý múmkindikteri boıynsha túsindirmeler beriledi, jumysqa ornalasýǵa jáne memlekettik qyzmetterdi alýǵa kómek kórsetý máseleleri boıynsha konsýltasıalyq qyzmetter kórsetiledi.