«Mektep avtobýsy» jobasy aıasynda Almatyda kún saıyn 8 myńnan astam oqýshy mektepke qatynaı alady
Úsh kúnnen beri Almatyda 100 jańa mektep avtobýsy júrip jatyr. Avtobýstar qaladaǵy 30 mektepke kúnine 8258 oqýshyny tasymaldaıdy. «Mektep avtobýsy» pılottyq jobasy Almaty qalasynyń ákimi Erbolat Dosaevtyń tapsyrmasymen júzege asyryldy jáne Qazaqstandaǵy mundaı aýqymdy jobanyń alǵashqysy. Jobany júzege asyrý aıasynda «AlmatyElektrotrans» JSHS Almaty qalasy Bilim basqarmasynyń kómegimen 100 mektep avtobýsy (onyń ishinde 50-i 21 oryndyq jáne 40 oryndyq 50 avtobýs) satyp aldy. Avtobýstar kishkentaı jáne mektepten shalǵaı turatyn oqýshylardy tasymaldaıdy.
Mysaly, №210 mektep-lıseıine yqshamaýdannan 222 bala tasymaldanady. «Baıbesik» jáne «Uljan-2» yqshamaýdanynan 148 bala, №200 mektep-gımnazıasyna Abaı saıajaıynan 241 oqýshyny tasymaldaıdy. №162 mektep-gımnazıasyna 175 balany «Jas Qanat» yqshamaýdanynan, al №183 jalpy bilim beretin mektepke mektep avtobýsy saıajaı alabynan jáne «Asqartaý» yqshamaýdanynan 76 oqýshyny alyp keledi.
Mektep avtobýstary barlyq halyqaralyq qaýipsizdik standarttary men tehnıkalyq talaptarǵa sáıkes keledi: apattyq shyǵý, qaýipsizdik beldikteri, múmkindigi shekteýli balalarǵa arnalǵan pandýs, órt qaýipsizdigi júıesi. Almaty qalasy ákiminiń orynbasary Ásem Núsipova atap ótkendeı, ár mektep boıynsha marshrýttyq paraqtar ázirlendi. Bul mektepke deıin jetkizýdi qajet etetin barlyq balany qamtý úshin jasalady. «Mektep avtobýsy» jobasynyń ekinshi kezeńin iske asyrý úshin Almaty qalasy qalalyq mobıldilik basqarmasy 2024 jyly qala mektepteri úshin qosymsha 50 avtobýs satyp alýdy josparlap otyr.
«Búgingi tańda balalardy otyrǵyzý jáne túsirý úshin arnaıy aıaldamalar bar. Sol baǵyt boıynsha oqýshylarmen birge arnaıy muǵalimder de erip júredi. Jobany odan ári keńeıtýdiń arqasynda 12500 bala qamtylady. Bizdiń baǵalaýymyzsha, dál osy 1-11 synypqa deıingi balalarǵa mektepke qatynaý úshin mektep avtobýstary qajet»,-dedi ol.
Almaty qalasy Bilim basqarmasynyń basshysy Lázzat Jylqybaevanyń aıtýynsha, qazir 30 mekteptiń barlyǵynda oqýshylardy tasymaldaýǵa kelisim-shart jasalǵan. Bul úshin búdjetten 1,4 mlrd teńge qarastyrylǵan.
«1 qyrkúıekten bastap barlyq avtobýs tıisti qaýipsizdik sharalaryn saqtaı otyryp, bekitilgen marshrýttar boıynsha balalardy tasymaldaıdy. «Mektep avtobýsy» jobasyn júzege asyrý oqýshylardyń qaýipsizdigin qamtamasyz etedi», - dedi Lázzat Áýesqanqyzy.
