Erbolat Dosaev bolashaq balalardy ońaltý ortalyǵynyń ǵımaratyn qaıta qurý jobasyn aıaqtaýdy tapsyrdy
Almaty ákimi Erbolat Dosaev Almaly aýdanyndaǵy jumys sapary aıasynda 1950 jyly salynǵan burynǵy temirjol gospıtaliniń qaraýsyz qalǵan ǵımaratyn qaıta jańartý jobasymen tanysty, onda aýysymda 250 adam qabyldaıtyn qalalyq balalar ońaltý ortalyǵyn ashý kózdelgen.
Qala basshysyna «Jetisý-Sáýlet Qurylysy» JSHS ázirlegen joba tanystyryldy.
«Biz qalanyń tarıhı ortalyǵyndamyz. Zamanaýı materıaldar men jańa tehnologıalardy qoldanyp, arhıtektýralyq kelbetti eskere otyryp, jobany ázirleý qajet», - dep qala ákimi usynylǵan joba qazirgi zamanǵy ońaltý ortalyǵynyń talaptaryna saı kelmeıtinin aıtty. Kompanıaǵa bıyl jyl sońyna deıin túzetýler engizý jáne aıaqtalǵan JSQ jobasyn tanystyrý tapsyryldy. Qurylys jumystary saraptamadan ótkennen keıin 2024 jyldyń mamyryna bastalady dep josparlanǵan.
Almaly aýdanynyń ákimi Aıdar Jaqybaevtyń aıtýynsha, jaqyn mańdaǵy úılerdiń turǵyndary qaraýsyz qalǵan ǵımaratqa alańdaýly. Osyǵan baılanysty megapolıs basshysy Erbolat Dosaev qurylys basqarmasyna sıfrlandyrý basqarmasymen birlesip, nysandy paıdalanýǵa bergenge deıin beınekameralar ornatý jáne qala turǵyndarynyń qaýipsizdigi úshin qaraýsyz qalǵan ǵımaratty qorǵaýdy kúsheıtý syndy ýaqytsha sharalar qabyldaýdy tapsyrdy.
Qoǵamdyq densaýlyq saqtaý basqarmasynyń aqparatyna sáıkes, ortalyq tirek-qımyl apparaty aýrýlary, balalardyń serebraldy sal aýrýy, bas jáne julyn jaraqatynan keıingi jaǵdaı, Daýn sındromy, júrek jáne endokrındik júıe aýrýlary bar 18 jasqa deıingi balalardy keshendi ońaltýǵa arnalǵan. Ortalyqta oqý-tárbıe jáne psıhologıalyq kómek bólimsheleri jáne medısınalyq-ońaltý, 114 oryndyq stasıonarlyq bólimshe, kúndizgi stasıonar jumys isteıdi.