Dálizde jándikterden dezınseksıalyq óńdeý júrgizilgen
Almatyda «Túrkistan» qonaqúıinde 18 bala hımıalyq zattan ýlandy. Bul týraly Almaty qalasynyń sanıtarıalyq-epıdemıologıalyq baqylaý departamentinen málim etti, dep habarlaıdy Almaty-akshamy.kz.
Vedomstvonyń málimetinshe, 11 shildede tańǵy saǵat 04:50-de qalalyq tótenshe jaǵdaılar departamentinen shuǵyl habarlama túsken. Túnde qonaqúıdiń 407 bólme men 4 qabattyń dálizinde jándikterden dezınseksıalyq óńdeý júrgizilgeni belgili boldy.
«Saǵat 08:40-ta Almaty qalalyq sanıtarlyq-epıdemıologıalyq baqylaý departamenti men Ulttyq saraptama ortalyǵy fılalynyń mamandary 407, 409, 417 qonaqúı nómirlerinde jáne 4 qabat dálizinde aýadaǵy formaldegıd, degıdrosýlfıd, amıak, hlorsýtegi jáne hlordyń konsentrasıasyn anyqtaýǵa zerthanalyq-aspaptyq zertteýler júrgizdi. Nátıjesinde shekti atalǵan zattardyń normalardan asý jaǵdaıy anyqtalǵan joq»,- dep habarlady qalalyq Sanıtarlyq-epıdemıologıalyqbaqylaý departamentinen.
Barlyq zardap shekkenderge der kezinde medısınalyq kómek kórsetildi. Densaýlyqtary jaqsarýyna baılanysty zardap shekken 13 bala men 1 jasóspirim sol kúni tańǵy saǵat 09:30-da Balalarǵa shuǵyl medısınalyq kómek kórsetý ortalyǵynan shyǵaryldy. Taǵy tórt balanyń jaǵdaıy aýyr dep baǵalandy. Almaty qalasy Qoǵamdyq densaýlyq saqtaý basqarmasynyń málimetinshe, búgingi kúni balalardyń jaǵdaıy turaqty.
«Departament mamany balalar zardap shekken qonaqúıden olardy kóshirýdi uıymdastyrdy. Sondaı-aq, Pavlodar qalasynan kelgen zardap shekken balalardyń ata-analaryn ornalastyrýǵa kómek kórsetti», - dep atap ótti vedomstvo.