Almatyda alǵash ret №2 qalalyq balalar klınıkalyq aýrýhanasynda balalardaǵy jambas býynynyń týa bitken aqaýlaryna joǵary tehnologıalyq rekonstrýktıvtik otalar jasaldy. Dálirek aıtsaq, sheberlik sabaǵy aıasynda Túrkıanyń jetekshi ortopedi Shenol Bekmezdiń qatysýymen 4 qazaqstandyq balaǵa joǵary bilikti kómek kórsetildi. Barlyq operasıa sátti ótti.
14 jastaǵy jasóspirimniń ata-anasy №2 Almaty balalar aýrýhanasyna kelip, balasynyń aqsańdap, aıaǵyn aýyrsynyp júrgenin aıtqan. Dárigerler «bas jambas súıektiń epıfızeolızi» dıagnozyn qoıdy. Bul – jambas súıek moınynyń alǵa qaraı jyljyp, qısyq ósýi. Bizdiń elimizde alǵash ret ótkizilgen Imhaýzer otasyn Túrik áriptesimizben birlesip oryndaý týraly sheshim qabyldandy.
«Bas jambas súıektiń qaýipsiz shyǵarylýy jasaldy. Súıek shyǵyńqysy joıyldy. Sodan keıin vertlýjdy oıpattyń sentrasıasy jasaldy. Bul Imhaýzer otasynyń modıfıkasıasy: ımpıchment, ıaǵnı qozǵalysty shekteý bolmaýy úshin súıektiń shyǵyńqy bóligi joıylady. Mundaı otalar buryn Qazaqstanda jasalmaǵan», – dedi travmatologıa bóliminiń meńgerýshisi Erlan Sadyrbalın.
Dál osyndaı dıagnozy bar taǵy bir 15 jastaǵy balaǵa osyndaı ota jasaldy. Eki balada da alǵashqyda jeńil aýyrsyný sındromy paıda bolǵan jáne eki-úsh aı boıy mazalaǵan. Biraq jasóspirimder bul týraly ata-analaryna aıtpaǵan. Sondyqtan mamandarǵa júgingen kezde túzetýge kesh boldy. Keıingi kezeńdegi túzetýler bas jambas súıektiń aseptıkalyq nekrozy sıaqty asqynýlarǵa ákeledi. Sondyqtan dárigerler jambas súıeginiń basyn burandamen aıamaı bekitip, ony biriktirdi. Sodan keıin olar balalardy otaǵa daıyndady.
Dárigerlerdiń aıtýynsha, ádette mundaı dıagnozy bar balalar óte kesh keledi. Sondyqtan ýaqyt ótkizip alǵandyqtan kúrdeli de aýyr otaǵa jatýyna týra keledi. Al der shaǵynda kelgen bolsa, shaǵyn ota jasaýǵa jáne sál ǵana 2 santımetrlik kesý arqyly súıekti burandamen bekitýge bolatyn kórinedi. Sondyqtan jaǵdaıdyń kúrdeli bolyp ketpeýi úshin ata-analar kóz aldynda júrgen balalarynyń aqsańdap júrgenine nazar aýdarýy kerek. Bul kezde balanyń omyrtqa baǵanasynda aýyrsyný paıda bola bastaıdy.
Imhaýzer otasy – búkil álem boıynsha jańa ádis. Otanyń qıyndyǵy – súıektiń oryn aýystyrý 40 gradýstan joǵary boldy, sondyqtan ortopedterge jambas býynyn býyn kapsýlasynyń tamyrlaryna zaqym keltirmesten shyǵaryp, deformasıany túzetip, eshteńege zaqym keltirmeý úshin ornyna qoıý kerek boldy.
Óz kezeginde Shenol Bekmez: «Otany jasamaý múmkin emes, óıtkeni bala ómir boıy aqsańdap qalady, al aldaǵy 10 jylda erte artroz, deformasıa jáne endoprotezdeý qajettiligi týyndaıdy» dep atap ótti. Aýrýlardyń 90%-y emdelmegen jaǵdaıda artrozǵa ákeledi. Sondyqtan bul ota protezdeý úshin kólemdi hırýrgıalyq aralasýdy boldyrmaý nemese keıinge qaldyrý úshin jasalýy kerek. Bul otanyń negizgi mindeti – júris pen deformasıany túzetý jáne jambas býynyn saqtaý deıdi mamandar.