Saıys Tuńǵysh Prezıdent kúni men el Táýelsizdiginiń 30 jyldyǵyna oraı uıymdastyryldy
Festıvál qalalyq «Sporttyq Almaty» baǵdarlamasy aıasynda ótkizildi jáne oǵan jeti men 17 jas aralyǵynda myńdaǵan jas sportshy qatysty, dep habarlaıdy Almaty-akshamy.kz.
Olardyń barlyǵy áýesqoı jekpe-jekpen aınalysady. Festıvál barysynda karate-do shotokan, penchak sılat, qoıan-qoltyq urys, mýaıtaı jáne jıý-jıtsý fýl kontakt túrlerinen jarystar ótkizildi. Saıysqa qalalyq sport klýbtarynyń 7-17 jasqa deıingi 1500-ge jýyq sportshy qatysty.
«Biz jas sportshylardyń kúshin tek jattyǵý zalynda ǵana emes, osyndaı úlken saıysta tekserýdi jón kórdik»,-deıdi «Sporttyq Almaty» qalalyq baǵdarlamasynyń jetekshisi Erjan Mýhamanov.
Sonymen qatar ol mundaı týrnırler balalar men jasóspirimderdiń minezin qalyptastyryp, aldyna maqsat qoıýǵa kómektesetinin jetkizdi. Oǵan qosa jastardyń sport sheberligin damytyp, salaýatty ómir saltyn nasıhattaı túsedi.
E. Mýhamanov atalǵan sharanyń Tuńǵysh Prezıdent kúni men el Táýelsizdiginiń 30 jyldyǵyna oraı ótkizilgenin atap ótti.
«Táýelsizdiktiń arqasynda biz dúnıejúzilik sport keńistigine shyǵa aldyq, jetekshi sporttyq tehnologıa men oqytý baǵdarlamalarymen tanystyq. Onyń barlyǵy dene tárbıesi men sportty damytýǵa óz septigin tıgizip jatyr»,-dedi ol.
Sóz arasynda ol Almaty ákimdigi tarapynan sportty damytý jumystary kóptep júrgizilip jatqanyn jetkizdi.
«Biz ótkizgen jekpe-jek festıvali kóptegen sharanyń biri ǵana. Jyl basynan beri «Sporttyq Almaty» baǵdarlamasy aıasynda kóptegen sporttyq shara ótti. Joba baǵdarlamasynda – velosherý, taýǵa órmeleý, mekteptik sporttyq buqaralyq sharalar bar»,-dep qorytyndylady Erjan Mýhamanov.
Sporttyq is-sharany Almaty qalasynyń sport basqarmasy Almaty qalasynyń jaýyngerlik óner asosıasıasynyń qoldaýymen ótkizdi.
