Almatyda balalar baıqaýyn uıymdastyrýshy alaıaqtyq jasady degen kúdikpen ustaldy.
Almaty qalalyq polısıa departamenti kámeletke tolmaǵan balalardyń ata-analarynan halyqaralyq baıqaýǵa qatysý syltaýymen aqsha jınaý deregi boıynsha sotqa deıingi tergeý jumystaryn bastady, dep habarlaıdy aqshamnews.kz Polisia.kz-ke silteme jasap.
Aldyn ala málimetterge sáıkes, 2024 jyldyń jeltoqsan aıynda jarıalanǵan is-sharanyń uıymdastyrýshysy sheteldik baıqaýǵa qatysýdy usynyp, ata-analardan qarjyny esepshottar arqyly jınaǵan. Alaıda ýádelerge qaramastan, baıqaý ótkizilmegen, balalar shetelge shyqpaǵan jáne qarjy qaıtarylmaǵan. Qazirgi tańda eldiń birneshe óńirinen azamattardan aryzdar tirkeldi. Materıaldyq shyǵyn kólemi anyqtalý ústinde.
Kúdikti ustalyp, ýaqytsha ustaý ızolátoryna qamaldy. Keshendi tergeý amaldary júrgizilýde. Polısıa azamattardy kámeletke tolmaǵandardyń saparlaryna qatysty kelisimder jasasqanda qyraǵylyq tanytýǵa jáne qandaı da bir usynystyń zańdylyǵyna kúmán týyndaǵan jaǵdaıda polısıaǵa júginýge shaqyrady.