Almatyda 6-10 qyrkúıek aralyǵynda VIII halyqaralyq BAIQONYR kınofestıvali ótedi, dep habarlaıdy Almaty-akshamy.kz.
Onyń basty mısıasy - jas talantty kınematografısterdi qoldaý.
Ár jyldary Qazaqstannan jáne jer álemniń túkpir-túkpirinen: Tbılısıden Iakýtıaǵa, Tashkentten Lıssabonǵa deıin 85 kınematografıst BAIQONYR-dyń laýreattary atanǵan. Bıylǵy jyly ótken Qazaqstan kınosynshylary qaýymdastyǵynyń ulttyq syılyǵynyń jeńimpazdaryn marapattaý rásiminde BAIQONYR-dyń prezıdenti Ánýar Kenjebaev "Festıvál qozǵalysyna qosqan úlesi úshin" arnaıy syılyǵynyń ıegeri boldy. Bul festıvál bedeliniń ósýiniń jarqyn kórsetkishi. Festıváldiń taǵy bir ereksheligi - osy jyldar ishinde kınofestıval memlekettiń qarjylyq qoldaýynsyz ótkizilip keledi.
6 qyrkúıekte festıvál Darhan Tólegenovtyń "Aǵaıyndylar" fılmimen ashylady. Bul shyǵarmashylyq jolyn "Baıqońyrdan" bastaǵan rejıserdiń tolyqmetrajdy debúti. Kartına sheteldik festıváldarda birneshe marapattarǵa ıe boldy, olardyń ishindegi eń mańyzdysy – Germanıadaǵy bedeldi Oldenburg International Film Festival qazylar alqasynyń arnaıy júldesi. Týyndy osy jyldyń kúzinde prokatqa shyǵady dep kútilýde.
"Darhan Tólegenovtyń "Aǵaıyndylar" fılminen basqa, bizde Mıhaıl Kýlýnakovtyń "Soqpaq" fılminiń konkýrstan tys kórsetilimi bolady. Eki rejıser de kezinde bizdiń qysqametrajdy fılmder baıqaýyna qatysqan. Endi bizge tolyqmetrajdy debútterimen qaıta oralyp otyr. Meniń oıymsha, bul óte jaqsy belgi", - deıdi Baiqonyr kınofestıvaliniń baǵdarlamalyq dırektory Erjan Jumabekov.
Bıylǵy jyly sonymen birge BAIQONYR aıasynda jeke anımasıalyq kınofestıval – ALMATY ANIMATION FESTIVAL ótedi.
Kórermender "ARMAN" kınoortalyǵynda kóretin jalpy konkýrstyq baǵdarlama kelesideı:
* BAIQONYR festıvali, onyń ishinde halyqaralyq kórkem jáne derekti qysqametrajdy fılmder baıqaýy (6 elden 18 fılm) jáne ulttyq kórkem jáne derekti qysqametrajdy fılmder baıqaýy (20 fılm);
* ALMATY ANIMATION FESTIVAL festıvali, onyń ishinde negizgi baıqaý (21 fılm, 4 el, sondaı-aq Reseı, Fransıa jáne Kanada birlesip shyǵarǵan fılm) jáne halyqaralyq stýdenttik anımasıalyq fılmder baıqaýy (23 týyndy).
Konkýrstan tys baǵdarlama da qyzyqty bolady dep kútilýde. Kınofestıval aıasynda TMD elderiniń kınotanýshylary men synshylarynyń II forýmy ótedi, onyń jumysyna ártúrli elderden 20-dan astam maman qatysady. Bilim berý baǵdarlamasy keńinen usynylǵan: tanymal sheberlerdiń dáristeri, kınoındýstrıanyń ózekti máseleleri boıynsha dóńgelek ústelder, jańa jobalardyń tusaýkeserleri.
Konkýrstan tys baǵdarlamanyń mańyzdy oqıǵasy 8 qyrkúıekte ótetin Koreı anımasıalyq kıno kúni bolmaq. Ol koreı-qazaq anımasıasynyń úlken arnaıy jobasy aıasynda ótkiziledi. Koreı tarapynan seriktes Pýchhondaǵy Halyqaralyq anımasıa festıvali (BIAF).
İs-sharaǵa Ońtústik Koreıadan anımasıalyq rejıserler Lı Son Gan men Im Cherın keledi. Olar óz jumystaryn usynyp, kórermenderdiń suraqtaryna jaýap beredi. Sonymen qatar, Cherın dáris oqıdy, al Lı Son Gan qazaqstandyq jas avtorlarǵa sheberlik sabaǵyn ótkizedi.
Kınorejısserlarmen birge K-pop mýzykasynyń ósip kele jatqan juldyzy Pek A Ón-de keledi, ol fılmderdiń birinde basty keıipkerdi dybystaǵan. K-pop janrynyń jankúıerlerin úlken tosyn syı kútip tur – olar Pek A Ónniń eki ánin jandy daýysta tyńdaı alady.
Festıvál dástúrli túrde TMD-ǵa qatysýshy memleketterdiń Memleketaralyq gýmanıtarlyq yntymaqtastyq qorynyń qoldaýymen ótkiziledi.
Festıváldiń aqparattyq seriktesteri: «Habar» agenttigi, «Almaty» telekanaly, «Eldoradıo» jáne «Jýldyz» radıostansıalary, «Egemen Qazaqstan», «Kazahstanskaıa pravda», «Antena Kazahstan», «Vremá» basylymdary, Orda.kz, Baribar.kz, 365info, Global.news.kz, BAQ.kz, QAZ365.kz, PRO Production ınternet-portaldary jáne JAS ONER jýrnaly.