Almatyda qazir sıyr etiniń kelisi 2347 teńge, taýyq eti - 1219 teńge
Almaty qalalyq kásipkerlik jáne ınvestısıalar basqarmasy áleýmettik mańyzy bar azyq-túlik taýarlarynyń baǵasy týraly málimetterdi usyndy, dep habarlaıdy Almaty-akshamy.kz.
Almaty qalasy boıynsha statısıka departamentiniń málimetinshe, 2 tamyzdaǵy jaǵdaı boıynsha qalada áleýmettik mańyzy bar azyq-túlik taýarlarynyń (ÁMAT) ortasha baǵasy: 1 keli un – 258 teńge, 1 bólke nan – 95 teńge, kespe - 245 teńge.
«Baǵany turaqtandyrý azyq-túlik korporasıasynyń qorlarynan astyq jetkizý arqyly qamtamasyz etiledi. Aýyl sharýashylyǵy mınıstrliginiń málimetinshe, Qazaqstanda kúzgi astyq mol bolady dep kútilýde», - dep habarlady kásipkerlik basqarmasynan.
Almatyda qazir sıyr etiniń kelisi 2347 teńge, taýyq eti - 1219 teńge, pıaz - 195 teńge, sábiz - 211 teńge, kartop -181 teńge, qyryqqabat- 92 teńgeden satylýda.
«Megapolıske kókónister Almaty, Jambyl jáne Túrkistan oblystarynan jetkiziledi. Kókónisterdi maýsymaralyq kezeńde satý boıynsha forvardtyq satyp alý sharty jasaldy, jyl sońyna deıin shamamen 74 myń tonna jetkizý týraly kelisim bar», - dep tolyqtyrdy basqarmadan.
Tamyz aıynyń basynda súttiń lıtri – 328 teńgeden, aıran – 379 teńgeden, sary maı – 3397 teńgeden, súzbe – 1940 teńgeden, kúrish – 292 teńgeden, qaraqumyq – 516 teńgeden, kúnbaǵys maıynyń bir lıtri – 879 teńge, 10 dana jumyrtqa – 460 teńge bolsa, tuzdyń baǵasy - 66 teńge. onymen qatar, kásipkerlik jáne ınvestısıalar basqarmasy tosap jasaý maýsymynyń bastalýyna baılanysty qalada qantqa degen suranys eki esege - táýligine 120 tonnadan 250 tonnaǵa deıin óskenin atap ótti.
Qanttyń 40%-dan astamyn Almaty (Qaskeleń, Talǵar, Ótegen batyr, Kegen Narynqol) jáne Jetisý (Taldyqorǵan, Jarkent, Sarqand, Úsharal) oblystarynyń turǵyndary satyp alady.
«Halyqtyń suranysyn oryndaý maqsatynda saýda jelileri, úı janyndaǵy dúkender men qalalyq bazar sórelerindegi qant kólemi 180 tonnaǵa deıin ulǵaıtyldy», - dep atap ótti ákimdiktegiler.
Aıta keteıik, demalys kúnderi ótetin jármeńkelerde qoljetimdi baǵadaqant satyp alýǵa bolady.
«Almatyda áleýmettik mańyzy bar azyq-túlikter baǵasynyń negizsiz ósýine jol bermeý boıynsha kúndelikti monıtorıń júrgiziledi. Máselen, turǵyndardyń aryz-shaǵymdary negizinde úı janyndaǵy 12 dúkenge qanttyń negizsiz qymbattaýyna tekserý júrgizilýde»,- dep habarlady kásipkerlik jáne ınvestısıalar basqarmasynan.