Almatyda kásipkerlerge qyzmet kórsetýdiń kópfýnksıonaldy ortalyǵy (KQKO) jumys isteı bastady.
Bul «Azamattarǵa arnalǵan úkimet» memlekettik korporasıasy men «Atameken» Ulttyq palatasy arasyndaǵy ózara yntymaqtastyq týraly birlesken memorandýmnyń aıasynda júzege asty.
Kásipkerlerge qyzmet kórsetýdiń kópfýnksıonaldy ortalyǵyn ashý - Prezıdentimizdiń Bıznes úshin úkimet qurý jónindegi tapsyrmasyn iske asyrýdaǵy kezekti qadam. Osyǵan deıin mundaı ortalyqtar Astana, Shymkent qalalarynda ashylǵan bolatyn. Munda qaladaǵy memlekettik organdar men bankterdiń ókilderi ornalasqan. Kásipkerlerge myńǵa jýyq qyzmet túri kórsetiledi. Kásipkerler barlyq qyzmetterdi bir jerde jáne bir ótinish boıynsha ala alady.
«Kásipkerlerge qyzmet kórsetýdiń kópfýnksıonaldy ortalyǵynda HQO mamany da qyzmet kórsetip otyr. Ol ashylǵaly beri, 10 kún ishinde 1 myńnan asa qyzmet kórsetip úlgerdi. Azamattar kóbine memlekettik qyzmetterdi onlaın alý boıynsha keńester alýǵa júginýde. Sonymen qatar Jeke kásipker retinde tirkelý, Jaýapkershiligi shekteýli seriktes ashý, birinshi nesıe búrosy anyqtamalaryn alý, elektrondyq sandyq qoltańba jasatý sıaqty azamattarǵa bıznes josparlaryn iske asyrý úshin qajetti memlekettik qyzmetterdi kórsetýde.Munyń bári kásipkerlerdi HQO-ǵa barýdan bosatady», - deıdi «Azamattarǵa arnalǵan úkimet» memlekettik korporasıasy Almaty qalasy fılıalynyń dırektory Abdýrasýl Kýldashov.
Sonymen qatar Ortalyqta servıstik qyzmetter kórsetý, halyqtyń kásipkerlik saýattylyǵyn arttyrý, barlyq kezeńderde kásipkerlerdi keshendi súıemeldeýdi qamtamasyz etý tárizdi barlyq qyzmetterdi alýǵa kómektesedi deıdi ortalyqty uıymdastyrýshylar.
Kásipkerlerdi qoldaý kópfýnksıonaldy ortalyǵy Almaty qalasy, Jibek joly dańǵyly, 135 mekenjaıynda ornalasqan.
Jumys kestesi: Dúısenbiden jumaǵa deıin, saǵat 9.00-den 18.30-ge deıin, túski úzilis saǵat 13.00-den -14.30-ǵa deıin.