Sergek sarapshylary kólik qozǵalysyn taldaý, monıtorıń jáne boljaý úshin ıntellektýaldy kólik júıesin (ITS) paıdalana otyryp, Almatydaǵy kólik aǵynyna tabıǵı oqıǵalar men mektepterdegi sabaqtardyń toqtalýy qalaısha áser etetinin zerttedi.
Esep negizine jer silkinisi bolǵan tún, 23 qańtarda sabaqtyń toqtatylýy, qalyń qar jaýǵan jáne qalypty ashyq kúnder alynǵan, dep habarlaıdy almaty-akshamy.kz.
23 qańtarǵa qaraǵan túni saǵat 00:09-da Almatyda jer asty dúmpýi tirkelgen. Osyǵan oraı, Sergek ITS júıesiniń derekteri qalada kólik qozǵalysynyń kúrt óskenin kórsetti. Qozǵalys belsendiligi orta eseppen 4,5 esege artyp, túngi saǵat 01:00-de sharyqtaý shegine jetip, tek tańǵy saǵat 5-te ǵana qalypty jaǵdaıǵa oralǵan.
Jer silkinisinen keıingi alǵashqy saǵatta qala joldaryndaǵy biregeı kólikterdiń sany 40%-ǵa artyp, kelesi saǵatta maksımým 208 myń birlikke jetti. Bul ótken aptanyń dál osy ýaqytymen salystyrǵanda 267%-ǵa artyq. Qaladan shyqqan kólikter sany da 152%-ǵa ósken, eń úlken ósim 01:00 men 02:00 aralyǵynda 239%-dy qurady. Sonymen qatar, Almatyda 23 qańtarda birinshi aýysymyndaǵy synyp oqýshylary úshin sabaqtardyń toqtatylýyna baılanysty tańerteńgilik kólik qozǵalysy tómendelgeni tirkelgen. Alaıda, ortasha jyldamdyq 25 paıyzǵa artqan.
Sergek sarapshylary qarly kúnderdiń Almatydaǵy kólik aǵynyna áserin de saraptady. Zertteý nátıjesinde qar jaýǵan kúnderi kóliktiń ortasha jyldamdyǵy saǵatyna orta eseppen 7 km-ge tómendeıtini anyqtaldy. Al jyldamdyqtyń maksımaldy tómendeýi tańǵy saǵat 8-de tirkelgen. Salystyrmaly túrde, eger ashyq kúnderi bul ýaqytta joldardaǵy ortasha jyldamdyq saǵatyna 44 km bolsa, qar jaýǵan kezde bul kórsetkish 20%-ǵa deıin tómendeıdi.
Esterińizge sala keteıik, Sergek ITS – Sergek qaýipsizdik júıesin jasaýshy qazaqstandyq IT mamandarynyń negizgi ázirlemeleriniń biri. Júıe Sergek aparattyq-baǵdarlamalyq júıelerinen alynatyn «úlken» derekterdi (big data) paıdalana otyryp, kólik jaǵdaıyn taldaý men modeldeýge múmkindik beredi. Bul óz kezeginde ýákiletti organdarǵa kólik aǵyndaryn tıimdirek uıymdastyrýǵa, sondaı-aq qalalyq ınfraqurylymdy josparlaý nemese oǵan ózgerister engizgen jaǵdaıda ne bolatynyn esepteýge kómektesedi.