Almatyda 100-den astam avtokólik ekologıalyq normalarǵa sáıkestigine tekserildi
Almaty qalasynda ekologıalyq qaýipsizdikti qamtamasyz etý jáne qorshaǵan ortany qorǵaý salasyndaǵy quqyq buzýshylyqtardyń aldyn alý boıynsha júıeli jumys jalǵasýda, - dep habarlaıdy Aqshamnews.kz.
Memleket basshysynyń "Zań men tártip" qaǵıdatyn iske asyrý jáne profılaktıka jyly aıasynda Almaty qalalyq polısıa departamentiniń jergilikti polısıa qyzmeti basqarmasy qyzmetkerleri "EKO Almaty" JSHS mamandarymen birlesip, avtokólikterden shyǵatyn zıandy zattardy baqylaý boıynsha reıdtik is-sharalar ótkizdi. 4-5 qazan kúnderi jyljymaly ekologıalyq zerthana kómegimen zamanaýı gaztaldaǵyshtar men tútinólshegish qurylǵylar arqyly avtokólikterdiń shyǵaryndylary tekserildi.
Barlyǵy 131 kólik quraly tekserýden ótti. Nátıjesinde 21 júrgizýshi ruqsat etilgen lastaýshy zattardyń shekti mólsherin asyrǵany úshin jaýapkershilikke tartyldy.
Almaty qalalyq PD jergilikti polısıa qyzmeti basqarmasy bastyǵynyń orynbasary Tımýr Noǵaıbaevtyń aıtýynsha, mundaı is-sharalar tek quqyq buzýshylyqtardy anyqtaýǵa ǵana emes, sonymen qatar azamattardyń ekologıalyq mádenıetin jáne óz avtokólikteriniń tehnıkalyq jaǵdaıyna degen jaýapkershiligin qalyptastyrýǵa baǵyttalǵan.
- Shahar ekologıasy – árbirimizdiń jaýapkershiligimiz. Bizdiń maqsatymyz – tek buzýshylyqtardy anyqtaý emes, olardy boldyrmaý, zańǵa baǵyný jáne óz qalamyzǵa uqypty qaraý mádenıetin qalyptastyrý, – dedi, Tımýr Noǵaıbaev.