Sebebi – olar zańsyz qaıta jabdyqtalǵan.
Almatyda jol-kólik oqıǵalarynyń aldyn alý jáne olardyń saldaryn azaıtý maqsatynda "Qaýipsiz jol" respýblıkalyq jedel-aldyn alý is-sharasy bastaldy, - dep habarlaıdy aqshamnews.kz Polisia.kz-ke silteme jasap.
Atalǵan sharanyń negizgi maqsaty – jol qozǵalysy qaýipsizdigin qamtamasyz etý, qoǵamdyq tártipti saqtaý jáne kólik apattarynyń sanyn azaıtý. Sondaı-aq júrgizýshiler arasynda profılaktıkalyq jumystardy kúsheıtip, jol qozǵalysy erejeleriniń saqtalýyn qatań baqylaýǵa alý. "Qaýipsiz jol" sheńberinde polısıa qyzmetkerlerine júktelgen basty mindet – jol qozǵalysy erejelerin buzý derekterin anyqtaý jáne olardyń aldyn alý.
Olardyń qatarynda mas kúıinde kólik basqarý, qarama-qarsy qozǵalys jolaǵyna shyǵý, qaýipsizdik beldigin taqpaý, kólik júrgizý kezinde telefon paıdalaný syndy óreskel quqyq buzýshylyqtar bar. Sonymen qatar apattyq jaǵdaı týdyrýy múmkin kólik quraldaryn anyqtaýǵa erekshe nazar aýdarylady.
Jolaýshylar men júkterdi avtomobıl kóligimen tasymaldaý kezindegi qaýipsizdik máselesi de basty nazarda. Osy maqsatta polısıa qyzmetkerleri avtoparkter men turaqtardy aralap, júrgizýshilermen túsindirý jumystaryn júrgizýde. Sondaı-aq oqý oryndarynda stýdentterge arnalǵan qaýipsizdik taqyrybyndaǵy semınarlar ótkizý josparlanǵan.
«Tańerteń júrgizilgen reıd barysynda qalaaralyq eki avtobýs joldan shyǵaryldy. Tekserý barysynda olardyń zańsyz qaıta jabdyqtalǵany anyqtaldy. Bul bizdiń tájirıbemiz kórsetkendeı, orny tolmas qaıǵyly oqıǵalarǵa sebep bolýy múmkin», - dedi Almaty qalalyq PD jergilikti polısıa qyzmeti basqarmasy basshysynyń orynbasary Tımýr Noǵaıbaev.