“UAQYT” qoǵamdyq qory Almaty qalasy Jastar saıasaty basqarmasynyń qoldaýymen Áýezov aýdany demalys ortalyqtarynyń «AUEZOV FEST-2025» jármeńkesin sátti ótkizdi.
”Bizdiń qor Áýezov aýdanyndaǵy jasóspirimder men jastardyń bos ýaqytyn tıimdi ótkizip, olardyń shyǵarmashylyq, zıatkerlik, sporttyq daǵdysy men múmkindigin jan-jaqty damytýǵa qyzmet etetin demalys oryndarynyń jumysyn úılestirip otyrady. Aýdanda 30 úıirme, seksıa jumys isteıdi. Olarǵa búginde 12 jastaǵy jasóspirimnen bastap, 35-ke deıingi jastar qatysyp júr. Bári tegin. Búgingi jármeńkege 17 demalys ortalyǵy keldi. Bul jármeńke demalys ortalyqtarynyń jetistigin, sondaı-aq úıirmelerge qatysqysy keletin jastar úshin múmkindik alańyn usyndy. Qazir jazylyp ketip, erteńnen bastap qatysa berýine bolady”, - deıdi “UAQYT” qoǵamdyq qorynyń dırektory Baýyrjan Sábıtuly.
“AUEZOV FEST-2025” festıvali qaladaǵy “Saryarqa” alańynda ótti.
Onda festıvál qatysýshylary men qonaqtary úshin demalys ortalyqtarynyń jármeńkesi, oıyn-saýyq konserttik baǵdarlamasy, damytýshy “sheberlik synyby” jáne sporttyq jarystar uıymdastyryldy.
”Bizdiń “AR” ortalyǵynyn tigin sehy bar. Ulttyq kıimder, taqıa tigemiz. Áshekeı buıymdar jasaımyz. Ózimiz tikken osy kıimdermen ulttyq sán aptalyqtaryna shyǵyp júrmiz. Bul - meniń dızaınerlik jobalarymnyń biri. Bizge tigin ónerimen aınalysqysy keletin jastar kóp keledi. Olardy jatsynbaı, birden baýyrǵa tartyp, tiginshiliktiń qyr-syryn úıretemiz. Tikken buıymyn kópshilikke usyna, sata bilýdi de úıretemiz. Bul isti hobbı kóretinder, ýaqytyn tıimdi ótkizgisi keletin jasóspirimder de az emes. Olarǵa da esigimiz ashyq. Jastardyń damyǵany, súıikti isimen aınalysqany bizdi árdaıym qýantady”, - deıdi “AR” demalys ortalyǵynyń jetekshisi, tanymal dızaıner Raýshan Ánýarbekova.