Almatydaǵy «FORUM» saýda oıyn-saýyq ortalyǵynda geımıng, kıbersport jáne sıfrlyq mádenıet jankúıerlerine arnalǵan Almaty Cyber Games Media & Cup – 2025 ótýde.
Joba úshinshi ret uıymdastyrylyp otyr jáne Qazaqstannyń Ortalyq Azıadaǵy sıfrlyq sport ortalyǵy retindegi mártebesin nyǵaıtyp keledi.
”Búginde kıbersport jaı ǵana oıyn emes, bul – tártip pen tabandylyqty, komandalyq rýh pen strategıalyq oılaýdy talap etetin naǵyz sport túri. Sonymen qatar, ol – jastar ómir súrip jatqan zamanaýı sıfrlyq mádenıettiń mańyzdy bólshegi. Osyndaı týrnırlerge qatysý jas urpaqtyń bolashaqta suranysqa ıe bolatyn daǵdylaryn damytyp qana qoımaı, jahandyq múmkindikterge jol ashady. Kıbersport jedel sheshim qabyldaýǵa, birige jumys isteýge jáne kez kelgen ózgeriske beıimdelýge úıretedi. Bul qasıetter tek ekran aldynda ǵana emes, ómirde de asa qajet”, — deıdi týrnırge qoldaý kórsetken Halyk qaıyrymdylyq qorynyń dırektory Saǵynbek Shýnkeev.
İs-sharaǵa elimizdiń túkpir-túkpirinen kelgen myqty oıynshylar men jankúıerler jınalǵan. Bıylǵy erekshelik – Counter-Strike 2 oıyny boıynsha medıalyq týrnırge basa nazar aýdarylyp otyr. Onda tanymal blogerler, akterler, strımerler men mýzykanttar baq synaýda.
Qatysýshylar júlde qory úshin ǵana emes, sonymen qatar, halyqaralyq deńgeıdegi ACG International týrnırine joldama alý úshin de jarysýda. Týrnır Dota 2, Counter-Strike 2 jáne FC 25 syndy úsh negizgi oıyn boıynsha ótýde.
ACG jobasynyń basty maqsattarynyń biri – eldegi sıfrlyq ınfraqurylymdy damytý. Kıbersport – sıfrlyq transformasıanyń mańyzdy kórsetkishi ǵana emes, sonymen birge IT men jańa tehnologıalarǵa ınvestısıa salýǵa tartymdy sala.
Búgin keshke deıin bolatyn týrnırdi tamashalaýdan qalys qalmańyzdar. Sizge sıfrlyq bolashaqtyń atmosferasyna enip, zamanaýı tehnologıanyń jetistigimen tanysý múmkindigi týyp tur.
İs-sharany iPlay Esports jáne Ulttyq stýdenttik kıbersport qaýymdastyǵy (NESA) Almaty qalasy ákimdiginiń Sıfrlandyrý basqarmasynyń qoldaýymen uıymdastyryp otyr.