Sınoptıkter elimizdiń bes qalasynda aýa sapasy nashar bolatynyn eskertti.
24 naýryzda, jeksenbide Qazaqstannyń bes qalasynda aýa sapasy nasharlap, atmosferada zıandy qospalar jıyntyǵy kóp bolýy múmkin, dep habarlaıdy Almaty-akshamy.kz
Boljamǵa sáıkes, Astana, Almaty, Atyraý, Aqtóbe jáne Qaraǵandyda qolaısyz meteorologıalyq jaǵdaılar tirkelýi múmkin.
Qolaısyz meteorologıalyq jaǵdaılar (QMJ) – atmosferalyq aýanyń betki qabatynda lastaýshy zattardyń jınalýyna yqpal etetin meteorologıalyq faktorlardyń qysqa merzimdi erekshe jıyntyǵy. Qolaısyz meteorologıalyq jaǵdaı kezinde eldimekenderdegi atmosferalyq aýanyń sapasy nasharlaýy múmkin.
Mundaı aýa raıy kezinde:
kóshede, ásirese, tasjoldardyń boıynda júrýdi azaıtý kerek;
balalar men júkti áıelder uzaq ýaqyt serýendemegeni jón;
sozylmaly ókpe, júrek-qan tamyrlary, alergıamen aýyratyn adamdar dári-dármegin ózimen birge alyp júrýi tıis;
taza aýadaǵy fızıkalyq belsendilikti shekteńiz;
dene shynyqtyrý jáne sporttyq is-sharalardy jabyq sport keshenderinde ótkizý kerek.