Ábilhan Qasteev atyndaǵy QR Memlekettik óner mýzeıinde elimizdegi eń jarqyn shyǵarmashyl áýletterdiń birinen sanalatyn Qasymbekovter týyndylaryna arnalǵan «Ónerli áýlet órnegi» atty kórme ashyldy.
Qasymbekovter áýletiniń túp-tamyry Jetisý Alataýynyń etegindegi qasıetti Taldy ólkesinen taraıdy. Bul – tabıǵat pen tarıh, ulttyq rýh pen shyǵarmashylyq bite qaınasyp, úılesim tapqan qutty meken. Ańyzdarǵa arqaý bolǵan, tastaryndaǵy petroglıfterimen únsiz syr shertetin, arasan bulaqtarymen shıpa darytqan, kóne órkenıetterdiń izimen tarıh tunǵan bul ólkeden shyqqan áýletke tereń dúnıetanym, qajyrly eńbek, tózimdilik pen názik kórkem talǵam daryǵan.
Kórmege áýlettiń birneshe býyny – aǵa urpaqtan bastap shóberelerge deıin qatysyp otyr. Olardyń qatarynda soǵys ardageri, sýretshi ári ónertapqysh Ahmetqalı Qasymbekov jáne onyń urpaǵy: balalary Bolat, Manarbek, Janargúl, Begaıym, nemereleri Aıǵanym Dýlatqyzy, Gúlmıra Appasova, Nazerke Manarbekqyzy, İlıas Slámǵazy, Órken Qasymbekov, Ádemi Nurtileý, sondaı-aq shóbereleri Hamza Dýlatuly men Alen Izbasarov bar.
Kórmege kelýshiler kórkem tildiń ýaqyt aǵymyndaǵy evolúsıasyn, ár avtordyń dara shyǵarmashylyq qoltańbasyn, sondaı-aq otbasylyq dástúrlerdiń ár týyndyda qalaı kórinis tabatynyn tamashalaı alady.
– Ekspozısıada músinshi Bolat Qasymbekovtiń óneri erekshe oryn alady. Avtordyń ár kezeńdegi – erterektegi jáne keıingi jyldardaǵy jumystary usynylǵan. Olardyń qatarynda: «Qorqyt» (2013), «Abyz ata» (qola, 2012), «Alma ustaǵan bala» (gıps, 2012), «Abaı Qunanbaev» (gıps, 2019), «Dinmuhamed Qonaev» (gıps, 2020), «Shahmat fıgýralary» (qola, 2023–2024), sondaı-aq 2024–2025 jyldary qoladan quıylǵan týyndylary bar. Sonymen qatar, onyń «Eltindi batyr», «Shoqan Ýálıhanov», «S.Nurmaǵambetov», «Baǵaı batyr» syndy Almaty, Uzynaǵash, Jarkent jáne Mańǵystaý óńirinde ornatylǵan monýmentaldy shyǵarmalarynyń fotomaterıaldary qoıylǵan, – deıdi kórme jetekshisi G.Jubanova.
«Ónerli áýlet órnegi» – bul tek kórkem jetistikterdi ǵana emes, sonymen birge otbasylyq dástúrlerdiń, rýhanı qundylyqtar men ónerge degen súıispenshiliktiń qýatyn beıneleıtin shyǵarmashylyq áýlettiń tiri shejiresi. Kórme mádenıettegi sabaqtastyqtyń mańyzyn eske salyp, ulttyq kórkem murany saqtaý men damytýǵa shabyt beredi.