Qazaqstan astanasy kúnine jáne Táýelsizdikke tartý retinde almatylyq balalar úshin 725 oryndy eki mekteptiń jańa korpýsy, 120 oryndy tórt memlekettik balabaqsha, sondaı-aq birneshe jekemenshik bilim berý mekemeleri ashyldy.
Almatyda orta bilimniń qoljetimdiligin qamtamasyz etý úshin qala ákimi Baqytjan Saǵyntaevtyń tapsyrmasy boıynsha memlekettik jáne jekemenshik mektepterdiń qurylysy júrgizilýde. Sondaı-aq jumys istep turǵan bilim berý nysandaryna jańa korpýstar salynyp, birneshe mekemede seısmıkalyq sharalar kúsheıtildi. Bul jyl sońyna deıin 21 myńnan astam jańa oqýshy ornyn ashýǵa múmkindik beredi.
Astana kúnine oraı Bostandyq aýdany Orbıta-1 yqshamaýdanynda 600 oryndy №60 gımnazıa ǵımaratynyń jańa korpýsy ashyldy. Gımnazıanyń jobalyq qýaty 1700 oqýshy ornyn quraıdy.
Gımnazıada keńeıtýdiń arqasynda qosymsha kabınetter paıda boldy jáne eki aýysymdy oqytý máselesi sheshiledi.
Alataý aýdanynda jumys istep turǵan №166 lıseı ǵımaratyna japsarlas 125 oryndyq jańa qosymsha qurylys orny ashyldy. Jańa ǵımaratqa deıin oqý ornynda 360 oryn boldy, qazir 485 oryndy quraıdy.
Almaty qalasynda Astana kúnine oraı eki jekemenshik mektep ashyldy. Olar - Bostandyq aýdany, Baǵanashyl yqshamaýdanynda 60 oryndyq "COSMO PRIMARY SHOOL" bastaýysh mektebi jáne qalanyń Áýezov aýdanynda 130 oryndy "AVS School" jeke mektebiniń ashylýy ótti.
Almatyda qala ákimi Baqytjan Saǵyntaevtyń tapsyrmasy boıynsha balabaqshadaǵy oryn tapshylyǵyn tómendetý boıynsha júıeli jumystar júrgizilýde.
Astana kúni qarsańynda Almaty qalasy, Naýryzbaı aýdany, Aqjar yqshamaýdanynda memlekettik tilde oqytatyn №194 balabaqshanyń ashylýy ótti.
Balabaqshanyń jobalyq qýaty 120 balany quraıdy. Sondaı-aq 40 jańa jumys orny quryldy.
Almaty qalasy Naýryzbaı aýdany, Taýsamaly yqshamaýdanynda 40 jańa jumys ornyn qurýmen 120 balaǵa eseptelgen №193 jańa memlekettik balabaqsha ashyldy.
Almaty qalasynda mektepke deıingi bilim berý ǵımarattaryn salýǵa bos jer ýchaskeleriniń jetispeýinen, ákimdik jalpy bilim beretin mektepterdiń aýmaqtarynda jańa balabaqsha salý týraly sheshim qabyldady. Bul balabaqshalardaǵy oryn jetispeýshiligi máselesin sheshýge, ár balaǵa úıdiń janyndaǵy mektepke barýǵa ári dostarymen serýendeýge múmkindik beredi.
Naýryzbaı aýdany, Taýsamaly yqshamaýdanynda №186 men №187 jalpy bilim beretin mektepterdiń aýmaǵynda árqaısysy 120 oryndyq eki jańa balabaqsha ashyldy.
Túrksib aýdanynda memlekettik bilim berý boıynsha 68 balaǵa arnalǵan "Adel" jeke menshik balabaqshasy ashyldy.
"Biz jeke menshik balabaqshada balalarǵa bilim men tárbıe berýge memlekettik qoldaý aldyq. Qazir jańa oqý jylyna toptar jınaımyz. Balalardy eki jastan bastap qabyldaımyz. Bul orys balabaqshasy, biraq balalarǵa qazaq tili men aǵylshyn tilderin de úıretemiz. Memlekettik baǵdarlamalardan basqa bilim berý jobalary da bar", – dedi balabaqsha quryltaıshysy Larısa Lı.
Almaty qalasy Bostandyq aýdanynda taǵy bir "ALGABAS-3" jeke menshik balabaqshasynyń ashylýy ótti.
Balabaqshanyń jobalyq qýaty 160 balany quraıdy. Sondaı-aq 35 jańa jumys orny ashyldy. Atalǵan balabaqsha memlekettik tapsyrys boıynsha jumys isteýdi josparlady.
2021 jyldyń basynan beri Almatyda 1,7 myń oryndyq 30-ǵa jýyq jekemenshik uıymdary ashyldy. Jyl sońyna deıin taǵy da 5 myń oryndyq 35 jeke balabaqsha ashý josparlanýda. Memlekettik tapsyrys 20 441 orynǵa 397 mektepke deıingi uıymǵa ornalastyryldy.