Almatyda «Ońtústik» óńirlik qolbasshylyǵyna qarasty áskerı bólimderdiń tárbıe jáne áleýmettik-quqyqtyq jumystar bólimshesi (top) bastyqtary men batalón komandırleri orynbasarlarynyń jáne áskerı bólimderdegi áskerı qoǵamdyq uıymdar tóraǵalarynyń úsh kúndik praktıkalyq daıyndyǵy ótti.
Alqaly jıynǵa Ulttyq ulannyń Almaty, Shymkent, Taldyqorǵan, Qyzylorda jáne Taraz qalalarynan kelgen 50-ge jýyq tárbıeshisi men áskerı qoǵamdyq uıymdardyń tóraǵalary qatysty. Jıynǵa basshylyq jasaǵan «Ońtústik» óńirlik qolbasshylyǵy qolbasshysynyń tárbıe jáne áleýmettik-quqyqtyq jumystar jónindegi orynbasary polkovnık Náztaı Álkeshev áskerdegi jeke quramnyń tárbıe jumysyn zamanaýı deńgeıge kóterý úshin birqatar mańyzdy máselelerge basa mán berýge shaqyrdy.
Aýqymdy shara barysynda óńirlik qolbasshylyqtaǵy zańdylyq pen áskerı tártiptiń jaǵdaıy, ony nyǵaıtýdaǵy áskerı qoǵamdyq uıymdardyń mindetteri týraly sóz qozǵaldy. Sonyń ishinde áıelder keńesi, kelisimshart boıynsha áskerı qyzmetshiler keńesi, ardagerler keńesi sıaqty uıymdar jumystarynyń mańyzy, bólimniń jalpy hal-ahýalyna tıgizer áseri men jeke quramdy tárbıeleýdegi róli erekshe atalyp ótti.
– Bizdiń basty maqsatymyz – áskerlerde tárbıe jumysyn uıymdastyrý máselelerin jetildirý, qazirgi talapqa saı ońtaıly múmkindikterin talqylaý jáne tárbıe jumystary boıynsha jaqsy oılary bolsa sonymen bólisip, bir-birimizben pikir almasý. Sondaı-aq áskerı qoǵamdyq uıymdardyń jumystaryn saraptaý, – deıdi ońtústik óńiriniń bas tárbıeshisi polkovnık Nıaztaı Álkeshev.
Tárbıe jáne áleýmettik-quqyqtyq jumystar basqarmasynyń bastyǵy podpolkovnık Arman Seıtov bólimder men bólinisterde berik áskerı tártipti, zańdylyq pen quqyqtyq tártipti ustanýda, óz qyzmettik mindetterin úlgili oryndaýǵa áskerı qyzmetshilerdi jumyldyrýdaǵy áskerı qoǵamdyq uıymdardyń jumysyn qalaı júzege asyrý kerektigin jetkizdi. Sonymen qatar ár ofıser basshylyq qujattardy qanshalyqty meńgergendigi tekserilip, jaýyngerlik daıarlyqtyń negizgi pánderi boıynsha synaqtar tapsyrdy.
Ásker ardageri zapastaǵy polkovnık Sabyrjan Súleımenov «Áskerı bólimderdiń ardagerler keńesimen tálimgerlik jumysty uıymdastyrý máselesi» týraly áskerı tárbıeshilermen keńinen talqylap, tujyrymdy oıyn ortaǵa saldy. Al «Ońtústik» óńirlik qolbasshylyǵy ardagerler keńesi tóraǵasynyń orynbasary zapastaǵy podpolkovnık Rafaıl Abdykeev pen 5571 áskerı bólimindegi ardagerler keńesiniń tóraǵasy zapastaǵy maıor Berik Almaǵambetov «Áskerı qyzmetshilerdiń áleýmettik osal otbasylarymen áskerı qoǵamdyq uıymdar jumysynyń ereksheligi jáne otbasylyq-turmystyq máselelerdi sheshý joldary» taqyrybynda sabaq ótkizip, tájirıbelerimen bólisti.
Jıynǵa qatysýshy ofıserlermen úsh kún boıy ádistemelik sabaqtar, semınarlar, dárister jáne jaýyngerlik qyzmet pen oqýdyń úzdikterin qurmetteý keshi sekildi sabaqtar ótkizildi. Qazaqstan Respýblıkasynyń Ortalyq memlekettik murajaıynda tanymdyq sabaq ta uıymdastyryldy.