Dalalyq jaǵdaıda tamaq pisirýdiń erekshelikteri de qarastyryldy
Áskerı qyzmetshilerdi azyq-túlikpen qamtamasyz etýdiń sapasyn arttyrý úshin Qarýly kúshterdiń, qoǵamdyq uıymdar men áskerı bólimderde tamaqtanýdy uıymdastyratyn fırmalardyń ókilderiniń qatysýymen dóńgelek ústel otyrysy ótti, dep habarlaıdy Almaty-akshamy.kz.
Atalǵan shara Qorǵanys mınıstri general-polkovnık Rýslan Jaqsylyqovtyń tapsyrmasy boıynsha uıymdastyryldy. Desanttyq-shabýyldaý áskerleri qolbasshysynyń basqarmasynda ótken otyrysqa Qurlyq áskerleriniń bas qolbasshysy general-maıor Talǵat Qoıbaqov basshylyq jasady.
Áskerı qyzmetshilerdiń tamaqtanýyn jaqsartý máselelerin talqylaýǵa Tárbıe jáne ıdeologıalyq jumystar departamentiniń bastyǵy general-maıor Serik Boranbaev, sondaı-aq sarbaz analary komıtetiniń ókilderi Almaty qalasynan Tatána Tropına jáne Pavlodar oblysynan Lılıa Haırýlına qatysty. Beınekonferensbaılanys arqyly ótken dóńgelek ústel otyrysyna óńirlik qolbasshylyqtar áskerleriniń jáne ásker tekteriniń qolbasshylary, áskerı bólimderdiń komandırleri qosyldy.
Keńeske qatysýshylar áskerı qyzmetshilerdi tamaqtandyrý sapasy men ony jaqsartý múmkindikterin, tamaqpen qamtamasyz etý salasyndaǵy sharttyq mindettemelerdi oryndaý, sondaı-aq sarbaz asqanalaryn kútip ustaý jáne ýaqtyly qyzmet kórsetý men jóndeý máselelerin talqylady. Odan bólek, dalalyq jaǵdaıda tamaq pisirýdiń erekshelikteri de qarastyryldy.
Dóńgelek ústel barysynda durys jáne úılestirimdi tamaqtaný – áskerı qyzmetshilerdiń densaýlyǵyn saqtaý men nyǵaıtýdyń kepili ekeni atap ótildi. Bul áskerı qyzmetshiler ǵana emes, qoǵam úshin de mańyzdy másele. Osyǵan baılanysty qoǵamdyq uıymdardyń ókilderimen áskerı bólimderde tamaq ázirleýdi uıymdastyrýdy baqylaý, azyq-túlik normalaryn áskerı qyzmetshilerge tolyq jetkizý boıynsha birlesken is-sharalar ótkizý oryndy.
Otyrys sońynda Qurlyq áskerleriniń bas qolbasshysy basshylyqtyń áskerı qyzmetshilerdi qamtamasyz etý máselelerinde ashyqtyqty, sondaı-aq áskerı qyzmettiń sapasy men bedelin arttyrýǵa múddeli qoǵamdyq uıymdarmen árdaıym yntymaqtastyq júrgizýge daıyn ekenin atap ótti.