Almaty, Almaty jáne Jetisý oblystarynan áskerı mindettiler qatysatyn kezekti áskerı jıyndar Radıoelektronıka jáne baılanys áskerı-ınjenerlik ınstıtýtynyń oqý ortalyǵynda ótip jatyr. Jıynǵa barlyǵy 120-ǵa jýyq adam shaqyrylyp, olar bir aı ishinde 15 áskerı mamandyqty meńgeretin bolady, dep habarlaıdy aqshamnews.kz
Jıynnyń negizgi maqsaty – áskerı daıyndyqty arttyrý jáne qorǵanys kúshterine qajetti áskerı mamandanǵan kadrlardy daıarlaý. Sondaı-aq, áskerı-oqytylǵan mamandardyń rezervin qalyptastyrý kózdelgen. Bul týraly oqý ornynyń bastyǵy, general-maıor Qaırat Daýtov atap ótti:
– Jıynnyń maqsaty – eldiń qaýipsizdigi men qorǵanys qabilettiligin qamtamasyz etý úshin kadrlyq resýrstardy daıyndaý jáne tolyqtyrý, – dedi ol.
Bir aı ishinde qatysýshylar ózderiniń áskerı mamandyqtary boıynsha teorıalyq jáne praktıkalyq daıyndyqtan ótedi. Dárister men tájirıbelik sabaqtardy áskerı oqý ornynyń profesor-oqytýshylary júrgizedi. Ásirese, praktıkalyq sabaqtarǵa erekshe kóńil bólinip, qatysýshylardyń kásibı sheberligin arttyrýǵa múmkindik beredi.
Jıynǵa qatysýshylardyń biri – Halyq Qaharmany, Keńes Odaǵynyń Batyry Mýrdın Tálipovtiń nemeresi Iashar Polotov. Ol ata jolyn qýyp, el qorǵaýǵa árdaıym daıyn ekenin jetkizdi:
– Men áskerı ınstıtýttyń áskerı kafedrasynda motojaıaý ásker vzvodynyń komandıri mamandyǵy boıynsha oqyǵan edim, sol ýaqyttan beri 21 jyl ótti. Qazir S-300 radıolokasıalyq barlaý kesheniniń basshysy retinde daıyndyqtan ótip jatyrmyn. Jıynǵa shaqyrylǵanyma qýanyshtymyn, óıtkeni bul meniń qabiletterimdi shyńdap qana qoımaı, jańa daǵdylardy úırenýge múmkindik beredi, – dedi Polotov.
Áskerı mindettilerdiń barlyǵy áskerı oqý orny polıgonynda ornalasqan shatyrly qalashyqta turyp jatyr, olarǵa tamaqtaný jáne qajetti jabdyqtarmen qamtamasyz etý uıymdastyrylǵan. Jıyn sońynda árbir qatysýshy synaq tapsyryp, onyń nátıjesi boıynsha áskerı jıynnan ótkenin rastaıtyn sertıfıkat jáne jeke minezdeme alady. Osy qujattar negizinde jergilikti áskerı basqarý organdary olarǵa kezekti áskerı shen berý týraly sheshim qabyldaıdy.
Aıta keteıik, Radıoelektronıka jáne baılanys áskerı-ınjenerlik ınstıtýty 2018 jyldan bastap áskerı mindettiler úshin jıyndar ótkizip keledi. Osy ýaqyt ishinde Qazaqstan Respýblıkasynyń Áýe qorǵanys kúshterine 600-ge jýyq maman daıarlanǵan.