Kún jylyna bastaǵanda, erigen qar jáne jańbyr sýlarynyń esh kedergisiz aǵyp ketýi úshin aýdan ákimdikteriniń merdiger kásiporyndary aryq jelilerin jappaı tazartý jumystaryn bastady, dep habarlaıdy Almaty-akshamy.kz.
6 aqpandaǵy jaǵdaı boıynsha, josparlanǵan 1329 shaqyrymnyń 626 shaqyrymy qardan, muzdan, laı men qoqystan tazartyldy. Kún saıyn 82 birlik tehnıka jáne 299 jumysshy jumyldyrylýda. Jumystar 25-28 aqpanda aıaqtalady. Eske salsaq, qala aýmaǵynda barlyǵy 1525 shaqyrym aryq jelileri bar.
Buǵan deıin belgili bolǵandaı, Almaty qalasy boıynsha sý basýdyń negizgi faktory aryq jelisi jańbyr men erigen sý aǵynyna qarsy tura almaıdy, al kolektorlyq-drenaj júıesi múldem joq. Sondaı-aq nóser jelileri de joq, kolektorlar men aryqtar qoqystarmen bitelip qalǵan, kárizge qosylmaǵan.
Sý tasqynyn joıý maqsatynda qala ákiminiń tapsyrmasy boıynsha ekologıa jáne qorshaǵan orta basqarmasy Almatyda jaýyn-shashyn kezinde únemi sý basyp qalatyn ýchaskelerge taldaý júrgizdi. Nátıjesinde barlyǵy 102 aımaq anyqtaldy, onyń ishinde 56 ýchaskeni sý basyp qalýy múmkin. Sondyqtan apatty qalpyna keltirý jumystaryn dereý júrgizý qajet.
56 ýchaskedegi sý tasqynyn joıý máselelerin sheshý úshin 12 kolektor men 4 arna (rekonstrýksıalaý jáne salý) qalpyna keltirilýi tıis. Qala boıynsha 2022 jyly apatty qalpyna keltirý jumystary aıasynda 72 ýchaskede jumystar bastaldy. Onyń ishinde búginde 63 ýchaskedegi jumystar aıaqtaldy (89%). Osy jumystar aıasynda uzyndyǵy 18,7 km 12 sý burý kolektory qalpyna keltirildi, jalpy uzyndyǵy 11,2 km 8 kanal salyndy jáne 2 kanal qalpyna keltirildi, 7 km aryq jelileri qaıta jańartyldy jáne salyndy, 15 qubyrly ótkel rekonstrýksıalandy, 1,4 km ózen arnalarynyń jaǵalaýy kúshnıtildi. Jalpy, jumystardyń 89%-y oryndaldy.
Aıta keterligi, 2022 jyldyń kúzgi kezeńinde júrgizilgen jumystardyń qorytyndysy boıynsha atalǵan ýchaskelerde sý tasqyny tirkelmegen.