Qaıǵyly oqıǵa byltyr jazda bolǵan.
Almatydaǵy Almaly aýdandyq sotynda óziniń áriptesin abaısyzda atyp óltirgen polıseıge úkim shyqty, dep habarlaıdy Almaty-akshamy.kz
"Sottalýshy ǵımaratty kúzetý boıynsha aýysymǵa kelgen. Ári qaraı sottalýshynyń áriptesi tabeldik qarýdy alǵannan keıin "K" esimdi sottalýshydan belbeýin bekitý úshin qarýdy ustaı turýyn ótingen. Tabeldik qarýdy alǵan sottalýshy qarýdy qoldanýdyń barlyq erejelerin elemeı, qarýdy tómen jáne joǵary terbete bastaǵan. Saldarynan sottalýshynyń abaısyzda atqan oǵy marqumnyń basyna tıgen", delingen qalalyq sot habarlamasynda.
Sottalýshy óz kinásin tolyq moıyndap, jasaǵan isine ókingen. Al prokýror 1 jyl 6 aıǵa bas bostandyǵynan aıyrý jazasyn suraǵan.
"Sot Qylmystyq kodekstiń 104-babynyń 1-bóligimen sottalýshyny 1 jyl 6 aı bas bostandyǵynan aıyrýǵa úkim shyǵardy. Sottalýshydan jábirlenýshiniń paıdasyna 10 mln teńge moraldyq zalal jáne shamamen 3,5 mln teńge materıaldyq zalal óndirip alyndy. Aıyptalýshynyń kinásin moıyndaýy jáne onyń jastyǵy jazany jeńildetken. İs boıynsha aýyrlatatyn mán-jaılar anyqtalǵan joq. Úkim zańdy kúshine áli engen joq jáne apelásıalyq tártipte shaǵymdanýǵa bolady", delingen Almaty soty taratqan aqparatta.