«Taza Qazaqstan» respýblıkalyq baǵdarlamasy jáne «Almaty – bizdiń ortaq úıimiz» naýqany aıasynda Almaty qalasynyń komýnaldyq ınfraqurylymdy damytý jáne Almaty qalasyn sıfrlandyrý basqarmalary arasynda kelisimge qol qoıyldy, dep habarlaıdy Aqshamnews.kz
Kelisim aıasynda komýnaldyq ınfraqurylymdy damytý basqarmasy Target AYA baǵdarlamasy boıynsha vıdeomonıtorıng júıesine qoljetkizdi. Bul jańalyq qaladaǵy sanıtarlyq normalardyń buzylýyn turaqty negizde anyqtaýǵa jáne olardy joıý úshin ýaqtyly sharalar qabyldaýǵa múmkindik beredi.
2024 jylǵy 18-24 qazan aralyǵynda «Jarqyn kúz» qalalyq naýqany kezinde vıdeomonıtorıng nátıjesinde Qazaqstan Respýblıkasynyń Ákimshilik quqyq buzýshylyq týraly Kodeksiniń 505-babynda belgilengen abattandyrý erejelerin saqtamaǵany úshin 17 kásipkerlik obektide buzýshylyqtar anyqtaldy. Almaty qalasynyń Komýnaldyq ınfraqurylymdy damytý jáne Tabıǵatty qorǵaý polısıasy basqarmasynyń qyzmetkerleri nysandarǵa jedel baryp, buzýshylarǵa aýyzsha eskertý jasady.
Bul irgeles aýmaqtardyń jaı-kúıi úshin kásipkerlerdiń jaýapkershilik deńgeıin arttyrýǵa baǵyttalǵan abattandyrýdyń jańa erejelerin engizýdiń arqasynda múmkin boldy.
Abattandyrý qaǵıdalarynyń negizgi baǵyttarynyń biri kásipkerlik obektilerin pasporttaý bolyp tabylady. Bul prosestiń maqsaty-árbir kásipker úshin irgeles aýmaqtardy abattandyrý jaýapkershiliginiń shekarasyn anyqtaý. Komýnaldyq ınfraqurylymdy damytý basqarmasynyń derekteri boıynsha qalada 5 590 kásipkerlik nysany pasporttalýǵa jatady. Qazirgi ýaqytta myńnan astam kásipker pasporttarǵa qol qoıdy.
Pasporttaý boıynsha barlyq jumystardy aıaqtaý 2025 jyldyń sáýirine josparlanǵan. Baǵdarlama aıasynda kásipkerler irgeles aýmaqtardy retke keltirýmen qatar, ǵımarattardyń qasbetterin kútý, tazalyqty saqtaý jáne komýnaldyq qaldyqtardy ýaqtyly shyǵarý jónindegi talaptardy saqtaýǵa mindetti.
Vıdeomonıtorıng júıesi jáne jańa abattandyrý erejeleri ómir súrý úshin qolaıly jaǵdaı jasaýǵa kómektesedi. Erejeni buzǵan kásipkerler QR Ákimshilik quqyq buzýshylyq týraly Kodeksine sáıkes ákimshilik jaýapkershilikke tartylatyn bolady.