“Altyn jas” baǵdarlamasyn 2024 jyldan 2028 jylǵa deıin iske asyrý josparlanǵan. Bul týraly Óńirlik komýnıkasıalar qyzmetiniń brıfıńinde Almaty qalasy jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov aıtyp berdi, dep habarlaıdy almaty-akshamy.kz.
Baǵdarlamaǵa Almaty qalasynda turatyn jáne tirkelgen zeınetkerlik jasqa tolǵan zeınetkerler, sondaı-aq menshik formalarynyń túrine qaramastan Almaty qalasynyń jumys berýshileri qatysady.
"Zeınetkerlik jastaǵy adamdardyń jalaqysy jumys berýshilerdiń qarajaty esebinen belgilengen jalaqy mólsheriniń keminde 50% jáne jergilikti búdjet qarajatynan 50% mólsherinde sýbsıdıalaý, biraq 1 ETJ nemese 85 myń teńgeden aspaıtyn mólsherde júrgiziletin bolady", – dedi Baýyrjan Jaýbasov.
Baǵdarlamaǵa qatysý merzimi eńbek qatynastaryn merziminen buryn toqtatý múmkindigimen 36 aıdan aspaıdy.
Baǵdarlama 2024 jyldan 2028 jylǵa deıingi kezeńge arnalǵan.
Baǵdarlamaǵa 2024 jyly keminde 500 adam, 2025 jyly – 1000, 2026 jyly – 1500 adam qamtylady. 2024 jylǵy 1 mamyrdaǵy jaǵdaı boıynsha Almaty qalasynda 2 249 370 adam turady, onyń 247 844-y zeınetkerler, bul halyq sanynyń 11%-y.
Zeınet jasyndaǵy adamdar úshin jumys oryndaryn qurý qajettiligin bilý maqsatynda jumys berýshiler men zeınetkerler arasynda saýalnama júrgizildi. Zeınet jasyna tolǵan 1 076 Almaty turǵyny qatysqan saýalnama qorytyndysy boıynsha 80 jasqa deıingi 48% (nemese 519 adam) eńbek qyzmetin jalǵastyrýǵa nıetti ekenin jetkizgen.
"Jumysty jalǵastyrýdyń negizgi sebepteri qoǵamǵa paıdaly bolýǵa degen umtylys (15%), jumys ornynda tálimgerlik qyzmetti júrgizý qajettiligi (40%) jáne qosymsha tabys tabý (45%) bolyp tabylady", – dep naqtylady B.Jaýbasov.
Monıtorıń qorytyndysy boıynsha vedimistik baǵynyshty uıymdar men jeke kásiporyndar arasynda 1 753 adamnyń jumysqa ornalasý qajettiligi anyqtaldy.
ÓKQ spıkeri zeınetkerlik jastaǵy adamdardy jumysqa ornalastyrýda eń kóp qajettilik Densaýlyq saqtaý, bilim berý jáne ónerkásip salalarynda ekenin, onyń 47%-y dáriger, orta jáne kishi medısınalyq personal, pedagog, tárbıeshi, ınjener, elektrık, monter, armatýrashy, gaz-elektr dánekerleýshi, mashınıst, ekonomıs, býhgalter, kasır t.b. sıaqty bilikti mamandyqtar ekenin atap ótti.
Sonymen qatar, Almaty qalasynyń jumyspen qamtý jáne áleýmettik baǵdarlamalar basqarmasy Eýropa men Azıanyń keıbir damyǵan elderiniń (Germanıa men Japonıa) halyqaralyq tájirıbesin zerttedi. Zertteý bul baǵdarlamalardyń iske asyrý oń dınamıkasyn kórsetti. Mysaly, Japonıada zeınetke shyqqan árbir ekinshi adam eńbek qyzmetin jalǵastyrýda eken. Osyǵan baılanysty, 2021 jylǵy sáýirden bastap zańnamalyq negizde mindetteme engizildi, onyń sheńberinde kompanıalar 70 jasqa deıingi eńbek qyzmetine múmkindik beretin júıeni iske asyrady. Osy júıe sheńberinde bıznes ıeleri 70 jasqa deıingi qarttardy jumyspen qamtyp qana qoımaı, osy sanattaǵy kadrlardyń aınalymyna taldaý júrgizýge mindetti.
Germanıada 2014 jyldan bastap "Mını" zeınetkerlerdi jumyspen qamtý formaty iske asyrylǵan. Ol boıynsha ýaqytsha jáne turaqty sıpattaǵy jumysqa aıyna 450 evro mólsherinde eń tómengi jalaqy berilýde.
Osylaısha, jumys berýshiniń osy baǵdarlama aıasynda bolsyn nemese óz yqtıarymen bolsyn zeınetkerlerdi jumysqa ornalastyrýǵa múddeli bolýy qamtamasyz etildi.
Baǵdarlamany iske asyrý kelesi algorıtm boıynsha, qarjylandyrý lımıtin negizge ala otyryp, Almaty qalasynyń eńbek utqyrlyǵy ortalyǵy (mansaptyq ortalyq) arqyly júzege asyrylady:
- jumys berýshi elektrondyq poshta arqyly jumys ornynyń bos ornyn kórsete otyryp, ótinim beredi a.jas@almaty.gov.kz jáne ony elektrondyq eńbek bırjasynyń onlaın servısine ornalastyrady Enbek.kz "zeınetker úshin" degen belgimen;
- berilgen ótinimder negizinde Almaty qalasynyń eńbek utqyrlyǵy Ortalyǵy mamandyǵy, sany, uzaqtyǵy jáne jumys kestesi, aıyna eńbekaqy mólsheri kórsetiletin uıymdardyń tizbesin jasaıdy;
- zeınetkerlik jastaǵy adam Almaty qalasynyń mansap ortalyǵyna jumysqa ornalasý týraly ótinishpen júginedi (Dostyq dańǵyly, 85, 2 qabat, kab. 201 A) nemese elektrondyq poshta arqyly a.jas@almaty.gov.kz;
- Mansap ortalyǵynyń qyzmetkeri túıindeme jasaýǵa jáne qolaıly jumys ornyn tańdaýǵa kómek kórsetedi jáne áńgimelesýge joldama beredi;
- joldama berilgennen keıin zeınetker jumys berýshimen áńgimelesýden ótedi, ol sátti ótken kezde Qazaqstan Respýblıkasynyń Eńbek kodeksine sáıkes eńbek sharty jasalady;
- jumys berýshi Almaty qalasynyń eńbek utqyrlyǵy ortalyǵyna jumysqa qabyldaý týraly buıryqty jáne Baǵdarlamaǵa qatysýshynyń eńbek shartynyń kóshirmesin usynady.