Aýlanǵan janýarlardy tasymaldaý mamandandyrylǵan avtokólikpen júzege asyrylady.
Qazir qańǵybas janýarlardy aýlaý gýmandy júrgiziledi. Bul týraly Óńirlik komýnıkasıalar qyzmetiniń brıfıńinde Almaty qalasy Kásipkerlik jáne ınvestısıalar basqarmasy basshysynyń orynbasary Erlan Omarov málimdedi, dep habarlaıdy Almaty-akshamy.kz.
Bul adam men janýarlarǵa ortaq asa qaýipti juqpaly aýrýlardyń taralýyna, sondaı-aq adamdarǵa agressıvti ıtterdiń shabýyl jasaýyna jol bermeý maqsatynda jasalynýda. Sonymen qatar, aýlaýdyń arqasynda qaraýsyz jáne qańǵybas janýarlardyń sanyn retteý boıynsha júıeli jumystar júrgizilýde.
Erlan Omarov osy jumystyń negizgi operatory Almaty qalasy ákimdigine qarasty kásiporyn – Almaty qalasy kásipkerlik jáne ınvestısıalar basqarmasynyń SHJQ "Qalalyq veterınarıalyq qyzmet" KMK bolyp tabylatynyn habarlady.
“Kásiporynnyń 6 kezekshi brıgadasy kúndelikti qaraýsyz jáne qańǵybas janýarlardy aýlaý jumystaryn júrgizedi. 2022 jyldyń naýryz aıyna deıin aýlanǵan janýarlar ıeleri tabylǵanǵa deıin jáne jańa ıelerine berilgenge deıin 3 táýlik boıy qaraýda bolǵan. QR veterınarıa salasyndaǵy zańnamasyna sáıkes, kereksiz dep tabylǵan janýarlar dári-dármekpen uıyqtatylǵan. 2022 jyldyń 2 naýryzynan bastap Qazaqstan Respýblıkasynyń «Janýarlarǵa jaýapkershilikpen qaraý týraly» zańynyń qabyldanýyna baılanysty, qańǵybas jáne qaraýsyz qalǵan janýarlardyń sanyn retteý tártibi aıtarlyqtaı ózgerdi", - dedi Erlan Omarov.
Jańa erejege sáıkes, asa qaýipti juqpaly aýrýlary jáne agresıa belgileri bar janýarlardy qospaǵanda, aýlanǵan janýarlardy jansyzdandyrý tyıym salynady.
Janýarlardy aýlaý jumystary olardyń jınalý oryndarynyń monıtorıńi nátıjeleri boıynsha jáne azamattardyń ótinishteri boıynsha aýlaý qyzmetiniń basshysy bekitken kestesine sáıkes júrgiziledi.
"Aýlaý janýarǵa jaraqat alýdy jáne mertigýdi boldyrmaıtyn gýmandy tásildermen júzege asyrylady. Adam men janýardyń ómirine nemese densaýlyǵyna naqty qater tóngen jaǵdaılardy qospaǵanda, balalardyń qatysýymen janýarlardy aýlaýǵa jol berilmeıdi. Aýlaý janýarlarǵa zıan keltirmeıtin quraldarmen, oqshaýlanǵan tuzaqtardy, torlardy, geldik oqshaýlaǵyshy bar ilmekterdi qoldana otyryp júzege asyrylady", - dep túsindirdi Erlan Omarov.
Brıfıń barysynda ÓKQ spıkeri aýlaýǵa qoǵamdyq oryndarda (kóshelerde, aýla aýmaqtarynda, saıabaqtarda, skverlerde, qaraýsyz qalǵan ǵımarattarda, qala shetinde, saıajaı alqaptarynda jáne basqa jerlerde) ıesiniń qaraýynsyz júrgen qaraýsyz qalǵan jáne qańǵybas janýarlar jatatynyn habarlady.
Ol vetqyzmettiń qyzmetkerleri jańa mamandandyrylǵan formamen jáne tıisti úlgidegi beıdjben qamtamasyz etilgendigin aıtty. Aýlanǵan janýarlardy tasymaldaý mamandandyrylǵan avtokólikpen júzege asyrylady.
“Aýlanǵan qańǵybas jáne qaraýsyz qalǵan janýarlar ýaqytsha ustaý pýnktine ákelinedi. Aýlanǵan janýarlardy qabyldaý, janýardy esepke alýdy qatań túrde veterınarlyq dáriger júrgizedi. Veterınarlyq dáriger janýarlardyń jaraqattary bar joǵyn anyqtaý úshin klınıkalyq tekserý júrgizedi, tańbanyń, tatýırovkanyń, mıkrochıptiń bolýyn skanerleıdi”, - dep jalǵastyrdy Erlan Omarov.
Janýarda chıp tabylǵan jaǵdaıda PetControl derekter bazasynan (PetControl - úı janýarlaryn esepke alatyn aqparattyq júıesi) qarap, janýardyń qaıtarylýyn qamtamasyz etý úshin janýardyń ıesimen habarlasady. Sondaı-aq, jaraqat pen zaǵıptyqty anyqtaý úshin veterınarlyq maman klınıkalyq tekserýden ótedi. Tabylǵan jaǵdaıda alǵashqy veterınarıalyq kómek kórsetiledi.
Aýlanǵan janýarlarǵa asa qaýipti aýrýlarǵa (oba, mıkrosporıa, trıhofıtıa) dıagnostıkalyq zertteýler júrgiziledi. Oń nátıje bergen janýar, kórsetilgen zańǵa sáıkes, dári-dármekpen jansyzdandyrylady.
Kórsetilgen prosedýralardan basqa, ustalǵan ıtterge kınologıalyq saraptama júrgizilýde. Asa qaýipti aýrýlary men agresıa belgileri anyqtalmaǵan janýarlar vaksınasıalaý, zararsyzdandyrý, tańbalaý jasalǵannan keıin úshinshi tulǵalarǵa beriletin nemese aýlanǵan oryndaryna jiberiletin bolady.
Aýlanǵan maldy zararsyzdandyrý jáne operasıadan keıingi kútim talaptaryn eskere otyryp, tıisti hırýrgıalyq qural-jabdyqtardy, veterınarlyq preparattardy jáne qorshaýlary bar modýldik bloktardy satyp alýǵa qosymsha qarajat bólindi.
Ózara is-qımyldy úılestirýdi jaqsartý úshin aǵymdaǵy jyldyń 20 shildesinde Almaty oblysynyń ákimdigimen yntymaqtastyq týraly Memorandýmǵa qol qoıyldy.