17 qyrkúıekte Almaty qalasynda Almaty Urban Fest 2022 ýrbanıstik jáne ekstremaldy sport túrleri festıvaliniń grand-fınaly ótedi.
Buǵan deıin 27 tamyz kúni 10 sport túrinen irikteý týrlary ótip, jarysqa 1100-den astam adam qatysty, dep habarlaıdy Almaty-akshamy.kz Olympic.kz-ke silteme jasap.
«Almaty Arena» sport kesheninde jarystyń sheshýshi kúni júldeli orynǵa jas skeıterler, rollerler, samokatshylar, BMX saıypqyrandary, basketbolshylar, bıshiler, armrestlıng pen vorkaýt sheberleri, treıserler men Dota 2 boıynsha kıbersportshylar júldeli orynǵa talasady. Grand-fınal jarysynda jalpy sany 500-ge jýyq sportshy baq synaıdy.
Bıyl Almaty Urban Fest is-sharasy Almaty qalalyq sport basqarmasynyń bastamasymen úshinshi ret uıymdastyrylyp otyr. Maqsaty – jastar arasynda tanymal zamanaýı sport túrlerin qoldaý jáne damytý. Festıvál baǵdarlamasy 2019 jáne 2021 jyldarmen salystyrǵanda irikteý týrlary, sondaı-aq kıbersport jáne parkýr syndy sport túrleri arqyly keńeıdi.
Sharaǵa qatysýshylar men qonaqtar fınal kúni art-ınstallásıa keshteri men shyǵarmashylyq baıqaýlardy tamashalaı alady. Jarys aıaqtalǵan soń kórermenderdi merekelik baǵdarlama kútedi.
Grand-fınal saǵat 9:00-de bastaý alyp, jeńimpazdar men júldegerlerdi marapattaý rásimi 18:30-da ótedi. Jankúıerler men qatysýshylarǵa arnalǵan merekelik baǵdarlama 20:00-de bastalady. Festıválǵa kirý tegin.