Almatyda demalys kúngi jármeńkeler jelisi keńeıip, Almaly jáne Jetisý aýdandarynda jańa saýda alańdary ashylady. Demalys kúngi jármeńkelerdiń uıymdastyrýshysy — «Almaty» Áleýmettik-kásipkerlik korporasıasy («Almaty» ÁKK) — bul ıgi bastamanyń aıasyn odan ári ulǵaıtyp, qalanyń ár túkpirin qamtyp keledi, - dep habarlaıdy Aqshamnews.kz.
Tamyz aıynan bastap Almaly aýdanynda jańa jármeńke alańy jumys isteı bastaıdy. Sondaı-aq, Jetisý aýdanynda da jańa saýda orny ashylady.
Búginde demalys kúngi jármeńkeler Almatynyń Almaly, Áýezov, Bostandyq, Medeý jáne Alataý syndy bes aýdanynda turaqty túrde ótip keledi. Jańa alańdardyń iske qosylýy qala turǵyndaryna fermerler men jergilikti óndirýshilerden tabıǵı ári jańa ónimderdi deldalsyz, qoljetimdi baǵamen satyp alýǵa múmkindik beredi.
Qazirgi tańda jármeńkelerge 328 aýyl sharýashylyǵy óndirýshisi ónimderin usynyp otyr. Munda jańa pisken kókónister men jemisterden bastap, et jáne sút ónimderi, nan-toqash buıymdary, bal, keptirilgen jemister men ara sharýashylyǵy ónimderine deıin mol tańdaý bar.
Barlyq ónim Almaty oblysynyń Qarasaı, İle, Talǵar, Jambyl jáne Eńbekshiqazaq aýdandaryndaǵy fermerlik jáne jeke sharýashylyqtardan, sondaı-aq, Almatynyń jetkizýshilerinen kelip túsedi.
Orta eseppen alǵanda, bir demalys kúninde jármeńkelerde 800 tonnadan astam ónim saýdalanady. Saýda senbi jáne jeksenbi kúnderi saǵat 09:00-den 18:00-ge deıin ótedi:
• Almaly aýdany — Masanchı kóshesi (Áıteke bı jáne Gogol kósheleriniń arasy);
• Áýezov aýdany — Ótegen batyr kóshesi (Abaı dańǵylynyń tómengi jaǵynda);
• Bostandyq aýdany — Qazaqfılm shaǵynaýdany (ál-Farabı dańǵylynyń joǵarǵy betkeıinde);
• Medeý aýdany — Meńdiqulov býlvary men Bekturov kóshesiniń qıylysy;
• Alataý aýdany — «Mádenıet» turǵyn úı kesheni.
Jármeńkelerdi apta saıyn 45 myńnan astam almatylyq pen qala qonaqtary keledi.
Demalys kúngi jármeńkelerde óz ónimin jańa usynǵysy keletinder +7 701 555 5457 nómirine (Ánýar) habarlasa alady.