ALMA CUP – ártúrli sport túrlerinen stýdenttik komandalar qatysatyn jastar arasyndaǵy sport chempıonaty
Almatyda «ALMA CUP 2023» stýdenttik sport chempıonatynyń jarystary ótedi, dep habarlaıdy Almaty-akshamy.kz BAQ.KZ-ke silteme jasap.
«Social Project Management» ortalyǵy» qoǵamdyq qorynyń uıymdastyrýmen osy aıdyń sońynan bastap «ALMA CUP 2023» stýdenttik sport chempıonaty bastalady.
ALMA CUP – ártúrli sport túrlerinen stýdenttik komandalar qatysatyn jastar arasyndaǵy sport chempıonaty. Bul týrnırdiń maqsaty – jastar arasynda salaýatty ómir saltyn nasıhattap, olardyń boıynda azamattyq jáne patrıottyq sezimderin oıatý, durys ómirlik ustanymdar qalyptastyrý jáne jas sportshylardy yntalandyrý.
Chempıonat aıasynda fýtbol lıgasynyń, basketbol lıgasynyń, voleıbol lıgasynyń jáne kıbersport lıgasynyń jarystaryn ótkizý josparlanǵan. Ár týrnır boıynsha júlde qory 1 200 000 teńgeni quraıdy. Sonymen qatar «ALMA CUP» fýtbol lıgasynyń jeńimpazdaryna stýdentter arasyndaǵy fýtboldan Respýblıkalyq lıgaǵa qatysý múmkindigin beriledi.
Aıta ketken jón, týrnırge Almaty qalasynyń barlyq joǵary oqý oryndarynyń stýdentteri qatysa alady.
Stýdenttik fýtbol lıgasy 25.03.2023 - 01.05.2023 aralyǵynda ótedi.
Basketbol lıgasynyń, voleıbol lıgasynyń jáne kıbersport lıgasynyń jarystary 01.09.2023 - 20.11.2023 aralyǵynda bolady.