Bul týraly QR Indýstrıa jáne ınfraqurylymdyq damý mınıstri Qaıyrbek Óskenbaev Telegram kanalynda jazdy.
Sońǵy ýaqytta kóp qabatty úıler men áleýmettik obektilerde ruqsatsyz qurylys júrgizý máseleleri jıilep ketken. Atalǵan kemshilik - memlekettiń jáne jalpy el turǵyndarynyń ortaq máselesi, dep habarlaıdy Almaty-akshamy.kz QazAqparatqa silteme jasap.
Vedomstvo basshysynyń paıymdaýynsha, jyl basynan beri qurylys nysandarynda jalpy somasy 169 mln teńgeden astam 615 ákimshilik quqyqbuzýshylyq tirkelgen.
«Biz jergilikti atqarýshy organdardyń sáýlet, qala qurylysy jáne qurylys qyzmeti salasyndaǵy jumystaryn turaqty negizde óz baqylaýymyzda ustaımyz. Máselen, Almaty qalasynda turǵyn úı keshenderiniń birinde qurylys jumystary zańsyz júrgizilgen. Ruqsat beretin qujattardy ýchaskeniń menshik ıesi de, qurylys salýshy da usynbaǵan. Qurylys salýshy páterlerdi satyp alý-satý sharttaryn jasasýǵa quqyǵy bolmaǵanyna qaramastan, atalǵan turǵyn úı keshenindegi páterler erkin saýdalanǵan. Tipti, qurylys salýshynyń úleskerlerden aqsha tartýyna ruqsat berilmegen», – dedi mınıstr.
Osylaısha, bıyl 28 naýryzda Almaty qala qurylysyn baqylaý basqarmasy keıbir ǵımarattarda qurylys-montajdaý jumystaryn toqtata turý jáne anyqtalǵan kemshilikterdi túzetý týraly usynys berdi. Qazirgi ýaqytta qurylys jumystary toqtatylyp, «Turǵyn úı qurylysyna úlestik qatysý týraly» zań normalaryn buzǵany úshin qurylys salýshyǵa qatysty hattama toltyrylǵan.
Mınıstr sonymen birge qańtar-naýryz aılarynda Indýstrıa jáne ınfraqurylymdyq damý mınıstrliginiń jaýapty komıteti 32 tekserý júrgizip, nátıjesinde 26 nusqama berilgenin, sondaı-aq, 18 laýazymdy tulǵa ákimshilik jaýapkershilikke tartylǵanyn habarlady.
Endigi kezekte QR IIDM memlekettik baqylaý jáne obektilerdi paıdalanýǵa qabyldaý júıesin tolyǵymen qaıta qaraıdy. Bul rette baqylaý mehanızmin kúsheıtý josparlanyp otyr. Onyń ishinde, obektiniń paıdalanýǵa berý daıyndyǵyn rastaý úshin nysandardy qabyldaý barysynda memlekettik sáýlet-qurylys baqylaý organdaryny mindetti túrde qatysatyn boldy.