Qazaqstanda alǵash ret 3D-tehnologıanyń kómegimen syrqattyń jambas súıegin qalpyna keltirdi
Astanalyq jedel járdem qyzmetiniń feldsheri Nurdáýlet Mekenbaıǵa Almatydaǵy Qazaq onkologıa jáne radıologıa ǵylymı-zertteý ınstıtýtynyń mamandary «hondrosarkoma» degen dıagnoz qoıǵan bolatyn. Osy aralyqta otandyq onkologter 23 jastaǵy naýqasty aldyn ala erekshe operasıa jasaýǵa daıyndady, dep habarlaıdy Almaty-akshamy.kz «Egemen Qazaqstan» gazetine silteme jasap.
Qazaqstanda alǵash ret 3D-tehnologıanyń kómegimen syrqattyń jambas súıegin qalpyna keltirdi. Birinshi operasıa Qazaq onkologıa jáne radıologıa ǵylymı-zertteý ınstıtýtynyń Súıekter, jumsaq tinder men melanoma isikteri ortalyǵynda júrgizildi.
«Naýqasqa aldymen mýltıdısıplınarlyq dárigerler toby keńes berdi. Buryn mundaı dıagnoz qoıylǵan kezde hırýrgter jambas súıekteriniń zaqymdalǵan aýmaǵyn alyp tastaýǵa májbúr edi. Bul jambas qýysynyń tutastyǵyn buzyp, adamnyń júrisiniń ózgerýine, naýqastyń omyrtqasynyń qısaıýyna ákeledi. Bul operasıanyń artyqshylyǵy, emdelýshiniń jasyn eskere otyryp, onkohırýrgter isikti alyptastap qana qoımaı, naýqastyń ómir sapasyn da saqtap qalýdy da maqsat tutty», - dedi «QazOjRǴZI» AQ Súıekter, jumsaq tinder men melanoma isikteri ortalyǵynyń basshysy, tájirıbeli onkohırýrg Ǵanı Serikbaev.
Joba túrindegi operasıany jasaý úshin qytaılyq Koln 3D Technology kompanıasymen qosa Gonkong ýnıversıtetimen birlesip uzaq merzimdi memorandým jasalǵan. Osy mámileden keıin naýqastyń KT-derekteri Gonkongqa jiberilip, sol qalada 3D-basyp shyǵarý arqyly kobált-hrom qorytpasynan arnaıy protez jasalǵan.
Osylaısha, onkologıadaǵy alǵashqy 3D operasıa bıyl qyrkúıek aıynda jasaldy. Operasıa barysynda pasıenttiń qyr-myqyn súıeginiń qanaty, sondaı-aq isikten búlingen jumsaq tinder alynyp tastaldy. 3 saǵatqa jalǵasqan operasıa kezinde kompúterlik jáne 3D-tehnologıalar qoldanyla otyryp, jeke málimetter boıynsha arnaıy jasalǵan jeke endoprotezben jambas súıekteri qaıta qalpyna keltirildi.
«Almatydaǵy onkologıa ınstıtýtyna óz tańdaýymmen keldim. 2018 jyldan beri osy dert mazalap keledi. Mamandar gıstologıaǵa teksergennen keıin operasıa jasatýǵa daıyndap, bul protez kez kelgen adamǵa qoıyla bermeıtinin jáne elimizde birinshi ret jasalatyn kúrdeli operasıa ekenin aıtty. Árıne, ýaıym da boldy, ózim de medısına salasynda júrgendikten, emosıalyq turǵyda daıyndalý, mújilmeý qajet ekenin ishteı túısindim. Dárigerlerge rızamyn, olar otanyń qandaı ádispen jasalatyny týraly óte jaqsy túsindirdi. Ásirese bólim meńgerýshisi Ǵanı Amangeldiuly men dárigerim Janat Ómirzaqqyzyna alǵys aıtamyn. Elge jany ashıtyn osyndaı myqty mamandar qatary kóbeıe berse eken dep tileımin. Olar osyndaı erekshe jaǵdaıda maǵan myqty psıhologıalyq kómek kerek ekenin de jaqsy túsinip, úlken qoldaý kórsetti. Eń bastysy, der kezinde emdelgenime qýanamyn», - dedi Nurdáýlet.