Almaty qalasyndaǵy №7 qalalyq klınıkalyq aýrýhanada alǵash ret AVEIR™ VR symsyz kardıostımýlátoryn ımplantasıalaý boıynsha biregeı ota jasaldy. Qazaq arıtmologtar qoǵamynyń prezıdenti, Astana qalasy PİB medısınalyq ortalyǵy aýrýhanasynyń dárigeri, profesor Aıan Abdrahmanovtyń qatysýymen ótken sheberlik saǵatynda birneshe sátti ota jasaldy. Almaty qalasynyń №7 QKA-da AVEIR™ VR ımplantasıasy alǵash ret qoldanyldy. Buǵan deıin mundaı jedel aralasýlar Astananyń birneshe mamandandyrylǵan medısınalyq uıymdarynda ǵana júrgizilgen.
Júrek yrǵaǵynyń buzylýy jáne aıqyn júrek qaqpaqshalarynyń patologıalaryn emdeýde AVEIR™ VR ımplantasıalaý ádisi júrek-qan tamyrlary júıesiniń aýyr dertterimen syrqattanǵan pasıentterge zamanaýı ınovasıalyq sheshim retinde qarastyrylýda. Klınıkada mamandardyń biliktiligin arttyrý júıeli túrde júrgizilip, úzdik klınıkalardyń jetekshi mamandarymen sheberlik saǵattary jıi ótkiziledi. Osy sheberlik saǵattyń arqasynda júrek-qan tamyrlary aýrýlarymen aýyratyn pasıentterdiń ómir súrý sapasyn jaqsartýǵa baǵyttalǵan jańa tehnologıa engizildi.
Sheberlik saǵat aıasynda №7 qalalyq klınıkalyq aýrýhananyń ıntervensıalyq arıtmologtary, hırýrgteri, kardıologtary jáne anestezıolog-reanımatologtary Aıan Abdrahmanovpen birge úsh biregeı ota jasady. Pasıentterdiń biri 70 jastaǵy azamat, onyń júrek-qan tamyrlary aýrýlary, joǵary qan qysymy, júrektiń ıshemıalyq aýrýy, sondaı-aq birneshe kúrdeli otalar jasalǵan jaǵdaıy boldy. Naýqas júrek soǵý jıiliginiń mınýtyna 10 soqqyǵa deıin tómendeýi saldarynan esinen tanyp, jedel járdem brıgadasymen aýrýhanaǵa jetkizilgen. Qajetti tekserýlerden keıin, oǵan elektrody joq elektrokardıostımýlátordy ımplantasıalaý usynyldy.
№7 QKA ıntervensıalyq hırýrgıa jáne arıtmologıa bólimshesiniń dárigeri Qanat Ergeshov AVEIR™ VR kardıostımýlátoryn ımplantasıalaý kúrdeli arıtmıa jaǵdaılaryn emdeýde jańa múmkindikter ashatynyn atap ótti. Onyń aıtýynsha, bul qurylǵynyń artyqshylyǵy – operasıanyń tiliksiz jáne jalpy anestezıasyz júrgizilýi, asqyný qaýpiniń tómendigi jáne pasıenttiń qysqa ýaqytta ońalýy.
AVEIR™ VR qurylǵysynyń basqa da erekshelikterine shaǵyn ólshemderi, 20 jylǵa deıin uzartylǵan batareıa qyzmeti, júrek qyzmetin qashyqtan baqylaý, temperatýralyq negizde jıilikti beıimdeý, MRT-ge tózimdiligi jáne az ınvazıvti ımplantasıa jatady. Bul tehnologıa, ásirese, balalarǵa jáne dástúrli ádister qoljetimsiz pasıentterge erekshe tıimdi.
Barlyq úsh ota josparǵa saı sátti ótti, shyǵyndar áleýmettik medısınalyq saqtandyrý qory esebinen qarjylandyryldy. Pasıentter aýrýhanadan shyǵarylyp, ambýlatorıalyq baqylaýda bolady.