Almaty qalasynda Kardıologıa jáne ishki aýrýlar ǵylymı-zertteý ınstıtýtynda alǵash ret MitraClip júıesiniń kómegimen mıtraldy klapandy endovaskýlárlyq klıpteý boıynsha mınıınvazıvti rentgen operasıasy jasaldy.
Operasıany Súrıhten kelgen (Shveısarıa) profesor Maýrısıo Taramassonyń jetekshiligimen jáne Ulttyq ǵylymı kardıohırýrgıa ortalyǵynyń (Astana) ıntervensıalyq kardıology, m.ǵ.d. Marat Áripovpen birlesip júrgizildi.
72 jastaǵy naýqas uzaq jyldar boıy 200/100 mm syn.baǵ. deıingi joǵary qan qysymynan, mıtraldyq jetkiliksizdikten jáne júrekshe fıbrıllásıasynan zardap shekken. Sonymen qatar, eki jyl buryn mıokard ınfarktisin ótkergen. Onyń jaǵdaıy demikpeniń órshýi, júrek qaǵýynyń jıileýi, qulaqtyń shýyldaýy, jalpy álsizdik jáne tez sharshaý belgilerimen nasharlap, emdeýge jatqyzyldy. Konsılıým ótkizilip, júrek yrǵaǵyn retteý jáne mıtraldy klapandy klıpteý jolymen túzetý úshin ókpe tamyrlarynyń radıojıilik ablásıasyn jasaý usynyldy.
Mıtraldyq jetkiliksizdikti emdeýdiń negizgi ádisi – klapan plasıkasy nemese tolyq aýystyrý operasıasy. Alaıda naýqastyń qosymsha aýrýlary men jaǵdaıynyń aýyrlyǵy hırýrgıalyq operasıanyń qaýiptiligin arttyrdy.
MitraClip – bul mıtraldy klapandy qalpyna keltirýdiń az ınvazıvti ádisi. Bul ınovasıalyq qurylǵy mıtraldy klapandy klıptep, qannyń keri aǵýyn (regýrgıtasıa) azaıtýǵa múmkindik beredi. Bul ádis ashyq júrek operasıasyn kótere almaıtyn naýqastar úshin jalǵyz múmkindik bolyp tabylady. Operasıa narkoz arqyly jasalyp, ıntervensıalyq hırýrgter san tamyrlary arqyly kateter kómegimen rentgen jáne últradybystyq baqylaýda mıtraldy klapanǵa jetedi. Qurylǵy klapanǵa bekitilip, ony qysyp, qan aǵysyn qalypqa keltiredi.
«Biz jańa tehnologıalardy engizip, zamanaýı medısınalyq úrdister men standarttardy ustanýǵa tyrysamyz. Bizdiń dárigerler Brússelde (Belgıa) ornalasqan Abbott kompanıasynyń trenıńtik ortalyǵynda taǵylymdamadan ótti. Instıtýttyń jáne Ulttyq ǵylymı kardıohırýrgıa ortalyǵynyń ıntervensıalyq kardıologtary men ÝDZ dárigerleriniń joǵary kásibıligin atap ótken jón. Operasıanyń sátti ótýi dárigerler komandasynyń úılesimdi jumysyna baılanysty», – dep atap ótti ınstıtýttyń Basqarma tóraǵasy Marat Pashımov.
Fýnksıonaldyq jáne últradybystyq dıagnostıka bólimshesiniń meńgerýshisi Aqjan Qonysbekovanyń aıtýynsha, bul operasıa ehokardıografıanyń tolyq baqylaýymen jasalady. Emhananyń zamanaýı 3D ehokardıografıa apparaty arqyly klıpti naqty ornatý orny anyqtalyp, ıntraoperasıalyq baqylaý júrgiziledi.
«Bul az ınvazıvti prosedýra naýqastyń qalpyna kelý ýaqytyn qysqartady, al jaǵdaıynyń jaqsarýy narkozdan shyqqannan keıin birden baıqalady. Mundaı operasıalardan keıin naýqastar tez saýyǵyp, birneshe kúnnen keıin úıge shyǵarylady. Olar úshin ómir súrý sapasy aıtarlyqtaı jaqsaryp, demikpe azaıady, fızıkalyq belsendilik artyp, medısınalyq kómekke júginý jıiligi tómendeıdi», – dep túsindirdi rentgenendovaskýlárlyq operblok meńgerýshisi Alekseı Kolesnıkov.
Aıta keterlik jaıt, MitraClip qurylǵysy 2020 jyly úzdik medısınalyq tehnologıa úshin Prix Galien USA syılyǵyn (Nobel syılyǵyna teń) jeńip alǵan.