Qazaqstanda mundaı deńgeıdegi jańajyldyq shoý buryn-sońdy bolmaǵan.
Respýblıka saraıynda buryn-sońdy bolmaǵan jańajyldyq «Álıhan jáne ýaqyt mashınasynyń qupıasy» atty qazaqstandyq fantasıkalyq otbasylyq qoıylym boldy, dep habarlaıdy Almaty-akshamy.kz.
Shytyrman oqıǵaǵa toly fantasıkalyq shoý Almatyda alǵash ret sahnalanyp otyr. Kúrdeli dekorasıalar men lazerlik proeksıa. Keremet kostúmder men úlken sharlar, ushatyn ınteraktıvti nysandarǵa baı qoıylym kishkentaı kórermenderdi oqıǵaǵa belsendi qatystyrýymen erekshelendi.
Qazaq jáne orys tilderindegi 3 pen 12 jas aralyǵyndaǵy kórermenderge arnalǵan oqıǵa ýaqyt mashınasynda aǵasyn izdep shyqqan qarapaıym qazaq balasy Álıhan týraly baıandaıdy. Birde tas dáýirinde, birde perǵaýyn saraıynda, birde Ejelgi Otyrarda, birde alys bolashaqqa, elder men dáýirlerdi batyldyqpen aralaǵan ol túrli shytyrman oqıǵalarǵa tap bolady. Ýaqyt máńgilik toqtap qalmas úshin, ol jańa jylǵa deıin talaı synaqtardan ótip, máńgilik kiltterdiń barlyǵyn jınap úlgerýi qajet.
Prodúser Sergeı Rýskoıdyń aıtýynsha, Qazaqstanda mundaı deńgeıdegi jańajyldyq shoý buryn-sońdy bolmaǵan.
«Biz oıyn-saýyq kontentin jasaý kezinde jańa standarttar ornattyq. Bul jaı ǵana eń úzdik rejıserlerdi jumysqa tartyp, sonymen qatar eń ozyq tehnologıalardy, sonyń ishinde sıfrlyq dekorasıany, lazerlik proeksıany, adam basqaratyn ushatyn jáne ınteraktıv nysandardy qoldanyp jatqanymyzda emes. Taǵy bir eń mańyzdy nárse bul: biz gadjetter áleminde ómir súretin jáne sýperqaharman bolýdy armandaıtyn qazirgi zamanaýı balalardyń tilinde sóıleımiz. Osylaısha Jańa jyl keshin ár balanyń júreginde jańdy ún tabatyn keıipkerlermen, keńistik pen ýaqytqa qyzyqty saıahatqa aınaldyrý ıdeıasy týdy», – deıdi prodúser.
Al senarıst Nurjan Tutovtyń pikirinshe, ınteraktıvti oqıǵa kórermenderge shoýdyń tolyq qatysýshysy bolýǵa jáne kóptegen jańa nárselerdi bilýge kómektesedi.
«Bul ıdeıanyń taǵy bir artyqshylyǵy – oqıǵany ári qaraı jalǵastyrý múmkindigi bar. – Búgingi tańda Álıhan Jańa jyldy qutqarsa, al erteń ol jańa qyzyqty saparǵa attanady. Onda qandaı qyzyqtar bolmaq? Bálkim, sýasty patshalyǵynda qazyna izdeı me? Jańa planetalarǵa attana ma? Búldirshinder erjúrek batyrmen qaıta kezdesýdi asyǵa kútedi. Tamasha kostúmder men akterlerdiń, ánshilerdiń, bıshilerdiń, mımıster men mýzykanttardyń talanty saıahatty umytylmas etedi», – deıdi ol.
Uıymdastyrýshylardyń aıtýynsha, naryqtaǵy ınteraktıvti spektáklderdiń jańa standarttaryna jáne otbasylyq shoýdyń qazaqstandyq óndirisine basa nazar aýdarylǵan. Ushatyn sharlar, jarqyn jıyntyqtar, ushqyshsyz zymyran shoý kórermenderin beı-jaı qaldyrmady.
«Keremet kostúmder jáne eń ozyq tehnologıalar sandyq jıyntyqtar, lazerlik proeksıa, basqarylatyn ushatyn jáne ınteraktıvti nysandar balalar úshin ǵana emes, sonymen qatar olarmen birge kelgen ata-analary úshin de qyzyq ótedi. Óıtkeni, biz jańa formattaǵy hám kúrdeli dekorasıalar men arnaıy effektiler arqyly elimizde alǵash ret naǵyz otbasylyq shoý jasadyq dep esepteımiz. Bılet satýdan túsken qarajattyń bir bóligi qaıyrymdylyq maqsattarǵa jumsalady. Óıtkeni, Jańa jyl – barshanyń basyn biriktiretin mereke!» – deıdi Bayev group bas dırektory Alekseı Baev.
Kórermenderine erekshe kóterińki kóńil kúı syılaǵan qoıylymdy 3 qańtarǵa deıin kúnine 2-3 ret kórsetý josparlanyp otyr. Bıletterdiń baǵasy zaldaǵy orynǵa baılanysty 3000 teńgeden 7000 teńgege deıin belgilengen.
Aıta keteıik, premeranyń alǵashqy kúni shoýǵa Almatydaǵy balalar úıleriniń, kópbalaly otbasylardyń balalary jáne áleýmettik osal jáne muqtaj otbasylardan shyqqan 2 000 bala keldi.