Almatyda alǵash ret Dúnıejúzilik stomatologtar Federasıasynyń Eýropalyq seksıasynyń Plenarlyq otyrysy ótti.
Forýmǵa 48 elden 110 delegat qatysty. Bul salalyq jıyn Eýropa men Ortalyq Azıa elderindegi stomatologıa salasynyń damý máselelerin talqylaıtyn mańyzdy alańǵa aınaldy.
Qatysýshylar aýyz qýysy aýrýlaryn dıagnostıkalaý men emdeýde ınovasıalyq tehnologıalardy qoldaný, klınıkalyq praktıkanyń túrli aspektileri, kúrdeli jaǵdaılarda jasalatyn hırýrgıalyq aralasýlar men profılaktıka sharalarynyń zamanaýı tásilderin talqylady.
Jıynnyń ashylýynda QR Densaýlyq saqtaý mınıstri Aqmaral Álnazarova quttyqtaý sóz sóıledi. Ol stomatologıanyń qoǵamdyq densaýlyqty qalyptastyrýdaǵy mańyzdy rólin atap ótti.
«Stomatologıalyq mártebe – aǵzanyń jalpy jaǵdaıynyń negizgi kórsetkishteriniń biri bolyp tabylady jáne somatologıalyq syrqattanýshylyqty azaıtýǵa baǵyttalǵan sharalar júıesin ázirleý – ult densaýlyǵyn jaqsartý baǵdarlamalarynyń ajyramas bóligi bolyp tabylady», – dep atap ótti vedomstvo basshysy.
Mınıstr barlyq stomatolog dárigerlerdi, eń aldymen, profılaktıkalyq sharalar arqyly aýrý deńgeıin tómendetý úshin kúsh biriktirýge shaqyrdy.
Ótken jyldan bastap respýblıkada mektep jasyndaǵy balalardyń arasynda stomatologıalyq aýrýlardyń júıeli profılaktıkasyna baǵyttalǵan baǵdarlama iske qosyldy. Maqsaty – erte kezeńde aýrýlardy anyqtaý jáne dınamıkalyq baqylaý arqyly stomatologıalyq aýrýlardyń taralýyn 10%-ǵa azaıtý, sonymen qatar, balalar úshin stomatologıalyq kómektiń qoljetimdiligin 80%-ǵa deıin arttyrý.
Qazaqstanda stomatologıa – sheteldiń alys-jaqyn elderinen medısınalyq týrıserdi tartatyn eń qarqyndy damyp jatqan medısınalyq salalardyń biri.
Búginde Qazaqstanǵa tis emdeý, parodont tinderin qalpyna keltirý, dentaldyq ımplantattaý jáne protezdeý úshin AQSH, Germanıa, Iran, Reseı jáne TMD elderi sıaqty 37 eldiń azamattary kelýde, bul – elimizdegi stomatologıalyq kómektiń joǵary sapasynyń aıqyn dáleli.