Qazaqstanda bir aıdan soń bilim berýdegi jańa tehnologıalar boıynsha álemdegi eń iri konferensıalardyń biri – EdCrunch Glocal ótedi. 8 jyl buryn qurylǵan konferensıa el Táýelsizdiginiń 30 jyldyǵyn merekeleý qarsańynda Almaty qalasynda ótpek, dep habarlaıdy almaty-akshamy.kz
İs-sharaǵa Máskeý, Tel-Avıv pen Sıngapýrdegi jergilikti onlaın-stýdıalardyń spıkerleri qosylady. Ótken jyly gıbrıdti (oflaın jáne onlaın) formatta ótkizilgen konferensıaǵa 14000-nan astam adam qatysty. Memlekettik bilim berý uıymdarynyń ókilderi úshin qatysý ádettegideı tegin bolady.
Konferensıa baǵdarlamasy bes bólimnen turady: erte balalyq shaq, 21 ǵasyr mektebi, sıfrly ýnıversıtet, korporatıvti oqytý jáne EdTech.
2021 jyldyń basty taqyryby – «Jańa bilim berý tájirıbesin jobalaý» (Learning experience design). 25 elden kelgen 300-den astam spıkerler 150 saraptamalyq sesıa, paneldik pikirtalas jáne sheberlik synyptaryn ótkizedi. Olar pedagogıkalyq dızaın salasyndaǵy ozyq tájirıbelerimen bólisedi, biregeı ıdeıalar men jańalyqtardy keń aýdıtorıaǵa jetkizý úshin bilim berý salasynyń bolashaǵy men jańa tehnologıalardyń, oqytý salasyndaǵy ǵylymı jetistikterdiń áserin talqylaıtyn bolady:
- Álemdik bestseller «Tabysty adamdy qalaı tárbıeleý kerek» kitabynyń avtory (100 myń danadan astam satylymy bar), Google keńesshisi, úsh qyzdyń anasy Ester Voıdjıskı balany kishkentaı kezinen jetistikke qalaı jeteleýge bolatyndyǵy týraly keńes beredi. Ol óziniń pedagogıkalyq tásilin beske bólip qarastyrady: óz-ózine sený, óz-ózin qurmetteý, derbestik, yntymaqtastyq, aqjúrektik.
- Álemge áıgili neırobıolog, «Ońtaıly mazasyzdyq» kitabynyń avtory Vendı Sýzýkı jaǵymsyz emosıalardyń kúshti jaqtaryn qalaı qoldaný kerektigin talqylaıdy jáne mazasyz sezimderdi qalaı ónimdilikke ózgertýge bolatyndyǵyn túsindiredi.
- Garvard ýnıversıteti janyndaǵy ınovasıalyq bilim berý baǵdarlamalary ortalyǵynyń ǵylymı qyzmetkeri Tonı Vagner ınnovatorlar býynyn qalaı tárbıeleý kerektigin aıtyp beredi.
- LX Design pıoneri, «bilim berý tájirıbesin jobalaý» termıniniń avtory Nıls Flor sandyq bilim berý salasy úshin onyń máni men mańyzdylyǵyn ashady.
- Álemdegi eń iri bilim berý onlaın-platformasy Coursera-nyń bas dırektory Djeff Madjıonkalda bolashaqtaǵy jumys pen qajet daǵdylar taqyrybyn kóteretin bolady.
Konferensıanyń baǵdarlamalyq dırektory jáne "MISıS" ǴZTÝ ortalyǵynyń dırektory Nýrlan Kıasovtyń aıtýynsha, EdCrunch maqsaty tıimdi oqytý arqyly árkimge ózin-ózi damytýǵa qoldaý kórsetý bolyp tabylady: «Biz muǵalimder men saıasatkerlerden bastap, kórnekti zertteýshiler men baǵdarlamashylarǵa deıingi álemniń úzdik sarapshylaryn biregeı ıdeıalary men jańalyqtaryn keń aýdıtorıaǵa jetkizýge shaqyramyz. Eń keremet ıdeıalar ýnıversıtet qabyrǵasymen, synyp aıasymen nemese kitap sórelerimen ǵana shektelip qalmaýy kerek. Olardy qoldap, bólisip, talqylap jáne qabyldaý men damytý qajet. Investorlar men quryltaıshylar, saıasatkerlr men fılantroptar, oqytýshylar, stýdentter jáne bilim berý tájirıbesine qyzyǵýshylyq tanytqandar EdCrunch Glocal-da bolýy kerek».
Konferensıa qorytyndysy boıynsha qatysýshylar ártúrli salalarda praktıkalyq tájirıbe alyp, kelesi suraqtarǵa jaýap taba alady: mektep jasyna deıingi balalarǵa arnalǵan erte damý ádistemesin qalaı tańdaý kerek, olardyń alýan túrliliginde qalaı shatasyp ketpeýge bolady; sandyq tehnologıalardy baǵyndyrý joldary men gadjetterdi balalar qabiletteriniń akseleratoryna aınaldyrý; EdTech kompanıalarynyń sapany joǵaltpastan bıznesti masshtabtaýy; mektep jasyna deıingi balalardan bastap, úzdiksiz bilim deńgeıine deıingi jobalarǵa ınvestısıa tartý jáne olardy ártúrli bilim berý júıelerine tıimdi engizý joldary.
Sondaı-aq spıkerler kelesi taqyryptardy talqylaıtyn bolady: daýystyq kómekshilerden bastap, jasandy ıntellektke deıingi bilim berýdegi jańa tehnologıalardyń áleýeti; postkovıdtik kezeńdegi mektep biliminiń revolúsıalyq formattary; neırobıologıany maksımaldy tıimdiliktiń negizi retinde qarastyrý; medıa, oıyn-saýyq, sport salalaryndaǵy bilim berý keńesteri men EdTech-tegi jahandyq jáne jergilikti trendter.
EdCrunch Glocal sharasynyń uıymdastyrýshylary Qazaqstan Respýblıkasy Bilim jáne ǵylym mınıstrliginiń qoldaýymen Almaty qalasynyń ákimdigi, Nazarbaev Zıatkerlik mektepteri. Bas seriktester – «Altyn Qyran Foundation» Qoǵamdyq qory, «Almatykitap baspasy» jáne «Sábı» Qaıyrymdylyq qory.
Tirkelý jáne qosymsha aqparat: edcrunch.online
Aıta keteıik, birinshi EdCrunch konferensıasy 2014 jyly Máskeýde «MISıS» UZTÝ-dyń qoldaýymen ótti. Hedlaıneri Coursera negizin qalaýshy Dafna Koller boldy. İs-sharaǵa 1 500 adam qatysty. Birinshi konferensıanyń kún tártibi sıfrlyq tehnologıalar men joǵary bilim berýdegi jańa tásilderge basa nazar aýdardy. Kelesi jyldary EdCrunch bilim berýdiń basqa da deńgeılerin (mektepke deıingi, mektep, joǵary, korporatıvti jáne EdTech startaptaryna arnalǵan baǵytta) aýqymdy qamtydy. Búginde Konferensıa aralas formatta: kózbe-kóz jáne álemniń birneshe eliniń onlaın-stýdıalarynyń qosylýymen ótedi.