Grek-rım kúresimen, bokspen, taekvondomen jáne bıatlonmen aınalysatyn jıyrma tórt jas sportshy Otan aldynda adal bolýǵa ant berdi.
Qorǵanys mınıstrligi Ortalyq sport klýbynyń quramy 22 sport sheberi jáne 2 sport sheberine úmitkermen tolyqty. Olardyń arasynda 3 álem chempıony, 2 álem kýbogy, 9 Azıa jáne 16 Qazaqstan chempıony bar, dep habarlaıdy Almaty-akshamy.kz.
Jasyna qaramastan, áskerge shaqyrylýshylardyń aıtarlyqtaı jetistikteri bar jáne ózderi aınalysatyn sport túrlerinen el quramasynyń sapynda shyǵady. Bul quramda Parıjdegi Olımpıada oıyndaryna lısenzıa alǵan Muhammedsabyr Bazarbaıuly da bar.
Saltanatty sharaǵa Qorǵanys mınıstrligi Sport komıtetiniń tóraǵasy – Ortalyq sport klýbynyń bastyǵy polkovnık Arman Ábeýov, eki dúrkin Azıa chempıony, eki dúrkin álem chempıony, Olımpıada oıyndarynyń chempıony Iýrıı Melnıchenko, halyqaralyq dárejedegi sport sheberi, «Qazaqstan barysy-2018» jeńimpazy Erjan Shynkeev jáne áskerge alynǵandardyń týǵan-týystary qatysty.
Sport rotasynyń sarbazdaryn Qorǵanys mınıstrligi Sport komıtetiniń tóraǵasy polkovnık Arman Ábeýov quttyqtady.
– Otanymyzdyń ıgiligi jolyndaǵy qyzmetteriń jaqyndaryń maqtana alatyndaı abyroımen ótýi kerek. Sporttaǵy jáne ómirdegi barlyq jeńister elimizge, Qazaqstan Respýblıkasynyń Qarýly kúshterine arnalsyn degen tilegim bar. Qorǵanys mınıstri armıa sportyn qashanda qoldaıdy. Áskerdegi qyzmet barysynda senderge jarystarda jattyǵýǵa jáne óner kórsetýge barlyq jaǵdaı jasalatyn bolady, – dedi polkovnık Arman Ábeýov.
Ant qabyldaý rásimine deıin sport rotasynyń sarbazdary jas jaýynger kýrsyn oqyp úırendi. Olar qarý-jaraqpen jáne qarýsyz bir ornynda jáne qozǵalysta saptyq tehnıkany úırenip, jalpyáskerı jarǵylardy, áskerı qyzmet qaýipsizdiginiń negizderin meńgerdi jáne atys daıyndyǵynan ótti.
– Sporttaǵy jeńisteri men rekordtaryna qaraı armıa klýbynyń tarıhy baı ekenin bilemiz. Biz Ortalyq sport klýbynyń dańqyn arttyrý úshin qoldan kelgenniń bárin jasaımyz. Mundaı sport rotasynda boryshymyzdy óteý biz úshin úlken mártebe, – dedi grek-rım kúresinen álem chempıony Sultan Ásetuly.
Kezdesý sońynda komıtet tóraǵasy polkovnık Arman Ábeýov sarbazdardyń ata-analarymen áńgimelesip, olardyń qyzmetiniń erekshelikteri týraly aıtyp berdi.