- Almaty búdjetiniń shamamen 44%-i (553,3 mlrd teńge) áleýmettik baǵyttaǵy shyǵystarǵa tıesili, onyń 75 paıyz úlesi nemese 416,5 mlrd teńge bilim berý salasyna jumsalady, - dedi máslıhat sesıasynda Erbolat Dosaev.
Bıyl 6000 oryndyq 4 jańa memlekettik mektep salyndy. Qosymsha 1800 oryndyq 2 mektep satyp alyndy.
Degenmen oqýshy oryndarynyń tapshylyǵy problemasy áli de bar, búginde 19 120 oqýshy orny tapshy. Boljam boıynsha, 2030 jylǵa deıingi mektep jasyndaǵy balalardyń jyl saıynǵy ósimi shamamen 13-14 myńdy quraıdy, sondyqtan oryn tapshylyǵy problemasy hronıcheskıı (turaqty) dese de bolady.
Oryn tapshylyǵy problemasyn túbegeıli sheshý úshin Memleket basshysy «Jaıly mektep» ulttyq jobasyn iske asyrýǵa qoldaý kórsetip, 2030 jylǵa deıin bir aýysymdy oqytýǵa kóshýdi qamtamasyz etýdi tapsyrdy. Ulttyq joba sheńberinde 2023 jyldan bastap Almaty qalasynda aldaǵy 3 jyldyń ishinde respýblıkalyq búdjet esebinen 53 mlrd. teńge somasyna 37 100 oryndyq 22 mektep qurylysyn bastaý josparlanýda.
Bul rette, jergilikti búdjet esebinen jalpy somasy 11 mlrd. teńgege jer ýchaskelerin satyp alý jáne ınfraqurylym tartý máseleleri sheshiletin bolady.
Ákimdik «1000 mektep» jobasyn da iske asyrýdy jalǵastyra beredi, joba sheńberinde 2023-2025 jyldary 27 150 oryndyq 36 mektep paıdalanýǵa beriledi. 2023 jyly 2 mektep pen 4 qosymsha qurylysty salýǵa 6,9 mlrd. teńge bólý josparlanýda.
Osylaısha, 2026 jylǵa deıingi tapshylyq basqarylatyn deńgeıge deıin tómendeıdi (3000-3500 oryn).