Mektepke deıingi bilim berý salasyndaǵy basty másele – balabaqshalardaǵy oryn tapshylyǵy
Búgingi kúni 1-6 jas aralyǵyndaǵy 42 460-tan astam bala, 3-6 jas aralyǵyndaǵy 18 865 bala kezekte tur. Bul týraly Almaty qalasynyń Óńirlik komýnıkasıalar qyzmetinde ótken brıfıńte Almaty qalasy bilim basqarmasynyń mektepke deıingi bilim berý bóliminiń basshysy Álıa Saǵıeva málim etti, dep habarlaıdy Almaty-akshamy.kz.
Bilim basqarmasynyń málimetinshe, qazirgi tańda qalada 77261 balany qamtıtyn 910 mektepke deıingi uıym jumys isteıdi, onyń ishinde 193 memlekettik (39 214 bala) jáne 717 jekemenshik (38 047 bala). 2 jastan 6 jasqa deıingi balalardy mektepke deıingi tárbıemen jáne oqytýmen qamtý – 71,9%, 3-6 jas aralyǵyndaǵylardy – 92,9% quraıdy.
«Mektepke deıingi uıymdarda kezektiń uzaq bolýyna, ishki kóshi-qonnyń júrýine jáne jyl saıyn týý kórsetkishiniń artýyna baılanysty mektepke deıingi uıymdardaǵy oryndarǵa degen qajettilik óte ózekti bolyp qala beredi. Osy oraıda Almaty qalasy ákimdigi memlekettik balabaqshalardy ashý baǵytynda aýqymdy jumystar atqaryp jatyr», – dedi Á.Saǵıeva.
Baıandamashy 2022-2024 jyldar aralyǵynda 16 myńnan astam orynǵa 188 jekemenshik balabaqsha (2022 jyly – 6 myń orynǵa 60 balabaqsha, 2023 jyly – 4950 orynǵa 71 balabaqsha, 2024 jyly – 5540 oryndyq 57 balabaqsha) ashý josparlanyp otyrǵanyn atap ótti.
Sonymen qatar, 2022 jyly kezekte turý máselesin kezeń-kezeńmen qysqartý jáne balalardy mektepke deıingi tárbıemen qamtýdy arttyrý maqsatynda "Jas Qanat" yqshamaýdanynda 280 oryndyq balabaqsha salynýda, sondaı-aq Jetisý aýdanynda 280 oryndyq balabaqsha satyp alyndy. 2023 jyly Áýezov aýdanynda 720 oryndyq 3 balabaqsha salý, 240 oryndyq balabaqsha satyp alý josparlanýda. 1380 oryndyq 5 balabaqshanyń qurylysy 2024 jylǵa josparlanǵan. 600 oryndyq taǵy 2 balabaqshanyń qurylysy 2025 jylǵa josparlanǵan.
Sonymen qatar, jýrnalıserdiń suraqtaryna jaýap bergen Á.Saǵıeva qaladaǵy mektepke deıingi uıymdarda mamandar tapshylyǵy máselesin de atap ótti.
«Tárbıeshiler tapshylyǵy shamamen 35-40 paıyzdy quraıdy, onyń ishinde mamandandyrylǵan mektepke deıingi bilim berý uıymdary bar, sonymen qatar logoped, defektolog, mýzykalyq jetekshi, medbıke, esepshi, tárbıeshi kómekshisi sıaqty mamandar qajet», - dedi Á.Saǵıeva.
Sonymen qatar, onyń aıtýynsha, qalanyń ortalyq aýdandarynda balabaqsha salýǵa jer tapshylyǵy da ózekti másele bolyp otyr. Bul jaǵdaıǵa jeke mektepke deıingi uıymdardyń memlekettik bilim berý tapsyrysy aıasynda jumys isteıtin búdjettik qarajatty jalǵan eseppen toltyrý, basqa óńirlerde turatyn balalardy balabaqshaǵa joldama alý saldarynan ıgerip alýy da keri áserin tıgizýde.