Almatyda erekshe qajettiligi bar adamdar teatr ónerin tegin meńgere alady. «Alataý» dástúrli óner teatry múmkindigi shekteýli jandarǵa arnalǵan 10 ınklúzıvti úıirme ashyp, bı, án aıtý, ym tilinde án aıtý, kúldirgi oıynda jáne sańyraýlarǵa arnalǵan daktılologıa ónerine úıretedi. Bul týraly Almaty óńirlik komýnıkasıalar qyzmetiniń baspasóz máslıhatynda teatr dırektory Maqsat Nuralıev málimdedi.
Onyń aıtýynsha, joǵary nátıje kórsetken qatysýshylar shyǵarmashylyq ujymdardyń quramyna enip, almatylyq teatr sahnasynda óner kórsetýge, sondaı-aq halyqaralyq baıqaýlarǵa qatysyp, álemdik deńgeıde talantyn tanytýǵa múmkindik alady.
«Sabaqtar aptasyna 3 ret, 2 saǵattan ótedi. Oqytýdy teatr artıseri men qazaq zaǵıptar jáne sańyraýlar qoǵamynyń jetekshileri júrgizedi. Qazirgi tańda bizdiń stýdıalar men úıirmelerde shamamen 200 adam bilim alyp jatyr. Sonymen qatar, Almaty qalasy ákimdigi Mádenıet basqarmasynyń qoldaýymen 130-dan astam is-shara ótkizdik. Olardyń ishinde erekshe qajettiligi bar adamdarǵa arnalǵan halyqaralyq festıválder men baıqaýlar, qaıyrymdylyq konsertter, dárister men mádenıet qaıratkerlerimen kezdesýler bar. Biz ınklúzıvti orta qalyptastyrýǵa tyrysamyz, munda óner adamdar sonyń arasyndaǵy naǵyz baılanys quralyna aınalady. Bizdiń artıserimiz – rýhtyń beriktigi men sheksiz múmkindikterdiń aıqyn dáleli. Búginde Italıa, Túrkıa, Qyrǵyzstan, Tájikstan jáne Malaızıada ótken halyqaralyq baıqaýlarda jeńimpaz atanǵan qatysýshylarymyz bar. Bul jobalarǵa bizdiń ónerpazdar ákimdiktiń qoldaýymen qatysty», – dedi Maqsat Nuralıev.
Aıta keteıik, «Alataý» dástúrli óner teatrynda «Kórý jáne estý qabileti buzylǵan adamdarǵa mádenı demalysty uıymdastyrý» bólimi bar. Onda zaǵıp jáne sańyraý jandar qyzmet atqarady.