22 mamyrda Almatydaǵy Shona Smahanuly atyndaǵy №62 gımnazıada erekshe is-shara ótti, - dep habarlaıdy aqshamnews.kz tilshisi.
Oqý-aǵartý mınıstrligi men Balalar quqyǵyn qorǵaý komıtetiniń bastamasymen, Halyqaralyq balalardy qorǵaý kúnine oraı uıymdastyrylǵan "Qazaqstan Balalary" tujyrymdamasy aıasynda 2-9 synyp oqýshylary arasynda "Ákem – tiregim, anam – júregim" taqyrybynda balalar sýret baıqaýy uıymdastyryldy.
Bul baıqaýdyń basty maqsaty – jas urpaqtyń boıyna otbasyǵa degen qurmetti, ulttyq salt-dástúrge degen súıispenshilikti jáne otbasylyq qundylyqtardy nasıhattaý boldy.
İs-shara barysynda 300-ge jýyq oqýshy óz týyndylaryn usynyp, olarmen birge ata-analar men ustazdar da belsene atsalysty.
Balalardyń salǵan sýretteri kóz qýantady: onda ákege degen senim, anaǵa degen mahabbat, baýyrmaldyq pen meıirim, birlik pen tatýlyq sıaqty otbasy uǵymynyń tereń máni kórinis tapty.
İs-shara ustazdar men ata-analardyń qoldaýymen jyly atmosferada ótti. Balalar tek óz shyǵarmashylyq qabiletterin emes, otbasyǵa degen kózqarasyn, ishki jan dúnıesin de qaǵaz betine túsire aldy.
Bul baıqaý – bolashaq urpaqtyń sana-sezimine otbasy qundylyqtaryn sińirýde mańyzdy qadam. Osyndaı is-sharalar balalardyń kórkemdik qabiletterin shyńdap qana qoımaı, olardyń rýhanı damýyna da úlken áser etedi.