Týǵan kún ıesin aıtýly kúnimen quttyqtaý saltanatty sharasy Radıoelektronıka jáne baılanys áskerı-ınjenerlik ınstıtýtynda ótti.
Oǵan Qarýly Kúshterdiń ardagerleri, Almaty óńirlik garnızonynyń quramalary men áskerı bólimderiniń komandırleri, áskerı oqý oryndarynyń profesor-oqytýshylar quramy, kýrsanttary men tárbıelenýshileri qatysty, dep habarlaıdy Almaty-akshamy.kz Qorǵanys mınıstrligine silteme jasap.
Qorǵanys vedomstvosy basshysynyń atynan mereıtoı ıesin onyń orynbasary general-leıtenant Sultan Kamaletdınov quttyqtady. Ol Aıtqalı Isenǵulovtyń jaýyngerlik dástúrler men urpaqtar sabaqtastyǵyn saqtaýdaǵy rólin atap ótti.
«Siz elimizdiń Qarýly kúshterindegi tárbıe qurylymynyń negizin qalaýǵa atsalystyńyz. Sizdiń basshylyǵyńyzben áskerı tártipti saqtaý jóninde eleýli jumystar júrgizildi, Qarýly kúshterdiń tárbıe jáne áleýmettik-quqyqtyq jumys organdarynyń ınstıtýty quryldy, "Áskerı qyzmetshiler men olardyń otbasy músheleriniń mártebesi jáne olardy áleýmettik qorǵaý týraly" Zań ázirlendi. Sizdi bilikti azamat, óz isiniń kásibı mamany jáne naǵyz general retinde bilemiz. Jaýapty laýazymdardy atqara otyryp, ózińizdi saýatty jáne bilikti basshy retinde kórsettińiz, sózben de, ispen de kez kelgen kúrdeli ári jaýapty tapsyrmany atqara alatynyńyzdy dáleldedińiz», – dep atap ótti ol.
General-maıor Aıtqalı Isenǵulov ásker qatarynda merzimdi qyzmettegi sarbazdan bastap generalǵa deıingi mansaptyq satylardan ótti. "Qurmet belgisi", "Qyzyl juldyz" ordenderimen marapattalǵan. Ol táýelsiz Qazaqstan Qarýly kúshteriniń qalyptasýy men damýyna qosqan úlesi úshin "Qurmet" ordenimen jáne kóptegen medaldarmen marapattaldy. Zeınette bolsa da, ol qoǵamdyq ómirge jáne jastardy áskerı-patrıottyq tárbıeleýge belsene aralasyp júr. Qarýly kúshter ardagerleri ortalyq keńesi bastyǵynyń orynbasary otstavkadaǵy general-maıor Marat Naǵumanov ardagerdiń táýelsiz Qazaqstannyń áskeri men tárbıe qurylymynyń qalyptasýyna qosqan úlesin atap ótti.
Ardagermen kezdesýge shaqyrylǵan qonaqtar onyń ómir joly jaıly beınerolıkti jáne ekspozısıalyq materıaldardy kórdi. İs-shara onyń qurmetine arnalǵan konsertpen aıaqtaldy.