Almatyda áıeldiń basyn kesip, bazarǵa aparyp tastaǵan kúdiktini qamaýda ustaý merzimi taǵy bir aıǵa uzartyldy.
Bul týraly Almaty-akshamy.kz QazAqparatqa silteme jasaı otyryp habarlaıdy.
«Almatynyń mamandandyrylǵan aýdanaralyq tergeý sotynyń 12 shildedegi aqparaty boıynsha, sottyń qaýlysymen sotqa deıingi tergeý organynyń ótinishhaty qanaǵattandyryldy jáne I. esimdi er adamǵa qatysty qamaýda ustaý merzimin 4 tamyzǵa deıin uzartýǵa sanksıa berý týraly ótinishi qanaǵattandyryldy»,- dep habarlady Almaty qalalyq sottyń baspasóz qyzmeti.
Eske salaıyq, 12 sáýir saǵat 08:40-te 102 púltine Sholohov kóshesindegi qaraýsyz qalǵan ǵımarattyń janynan áıeldiń máıiti tabylǵan bolatyn.
1976 jyly týǵan, turǵylyqty jeri joq, buryn esirtki qylmysy úshin birneshe ret sottalǵan áıeldiń basyn kesip alynǵany anyqtaldy.
Biraz ýaqyttan keıin sol mańdaǵy saýda oryndarynyń birinen máıittiń basy tabyldy.
Keıin 61 jastaǵy kúdikti er adam ustalyp, sot sanksıasymen qamaýǵa alyndy.