Sharaǵa kompozıtordyń urpaqtary men óner qaıratkerleri qatysty
Almatydaǵy Memlekettik Ortalyq mýzeıi Qurmanǵazy atyndaǵy Qazaq Ulttyq halyq aspaptar orkestrimen birigip, Qazaq KSR Halyq artısi, Memlekettik syılyqtardyń laýreaty, kompozıtor, dırıjer Ahmet Qýanuly Jubanovtyń týǵanyna 117 jyl tolýyna arnalǵan saltanatty is-shara ótkizdi, dep habarlaıdy Almaty-akshamy.kz.
Shara aıasynda qazaq mýzyka óneriniń kóshin alǵa súıregen biregeı tulǵaǵa arnalǵan kórme uıymdastyrylyp, ómirlik, shyǵarmashylyq jáne ǵylymı-pedagogıkalyq jolyn baıandaıtyn qundy jádigerler qoıyldy. Olar óner qaıratkeriniń ǵylymı eńbekteri, qoljazba partıtýralary, marapattary, jeke qujattary men dombyrasy, frak jáne dırıjerlyq taıaqshasy syndy eksponattar.
Saltanatty shara barysynda Qazaqstan Respýblıkasy Memlekettik Ortalyq mýzeıi dırektorynyń orynbasary Sarov Serjan Barahanuly, Qurmanǵazy atyndaǵy Qazaq Ulttyq halyq aspaptar orkestriniń dırektory Qýanyshev Medet Ermekqalıuly, Qurmanǵazy atyndaǵy Qazaq ulttyq konservatorıasynyń profesory, kompozıtor, QR eńbek sińirgen qaıratkeri Daldenbaı Beıbit Ábiluly, Qurmanǵazy atyndaǵy Qazaq ulttyq konservatorıasynyń dosenti, PhD doktory Berdibaı Aıjan Rahmanqulovalar quttyqtaý sóz sóıledi.
Konserttik baǵdarlamada Qurmanǵazynyń, Ahmet Jubanovtyń, Ǵazıza Jubanovanyń, Murat Sydyqovtyń, Qýanysh Núkishevtiń shyǵarmalary jáne qazaq halyq ánderi oryndaldy.
Qurmanǵazy atyndaǵy Qazaq ulttyq konservatorıasynyń vokaldyq óner kafedrasynyń stýdentteri, halyqaralyq baıqaýlardyń laýreattary Arýjan Alpysbaeva men Shyńǵys Nurǵalıulynyń óneri de kópshilikti súısintti.
Sharaǵa kompozıtordyń týystary, urpaqtary men óner qaıratkerleri qatysty.