«Ǵasyr tolǵaýy» kórmesinde respýblıkanyń ártúrli qalasynan 100-den astam jumys qoılady
2022 jyldyń 25 naýryzynda Qazaqstan Respýblıkasy Memlekettik ortalyq mýzeıinde Babalar amanaty jobasy aıasynda, ult ustazy Ahmet Baıtursynulynyń 150 jyldyǵyna oraı uıymdastyrylǵan Qazaqstannyń «Kórkem eńbek» páni muǵalimderiniń qatysýymen Respýblıkalyq «Ǵasyr tolǵaýy» atty kórmeniń ashylýy ótedi, dep habarlaıdy Almaty-akshamy.kz.
Babalar amanaty jobasynyń maqsaty Respýblıkamyzdaǵy búkil kórkem eńbek páni muǵalimderiniń basyn qosý, bolashaqta óskeleń urpaqtyń tálim tárbıesimen bilim negizin ushtastyrý, sondaı-aq ár qıly janrdaǵy týyndylardyń qyr-syryn tarıh taǵlymyna tereń boılata otyryp, osy ustazdardyń arqasynda kórermenge jetkizý.
Shyǵarmashylyqpen aınalysatyn úzdik 80-nen astam elimizdiń túkpir-túkpirinen qatysatyn ustazdardyń týyndylary qoıylmaq. Sonaý este joq eski zamannan beri kele jatqan ulttyq ónerimizdi óskeleń urpaqtyń boıyna darytyp, babalarymyzdyń kıeli ónerin ǵasyrdan ǵasyrǵa jetkizip, tarıh betterinde altyn árippen jazyp qaldyrý ustaz
Bıyl «Babalar amanaty» Ulttyq jobasynyń qurylǵanyna úsh jyl tolady. Jobaǵa QR Sýretshiler Odaǵy, QR dızaınerleriniń Eýrazıalyq Odaǵy, Qolóner Odaǵy jáne shyǵarmashylyqpen aınalysatyn Qazaqstan Respýblıkasynyń Kórkem eńbek muǵalimderi kiredi. Olar Túrkıa, Gresıa jáne Ortalyq Azıa elderi sıaqty halyqaralyq kórmelerge únemi qatysady.
Qanaǵat Kodekov – «Babalar amanaty» jobasynyń jetekshisi, kýratory, «Úzdik Pedagog-2021» jeńimpazy, QR Sýretshiler odaǵynyń múshesi, «Babalar amanaty» halyqaralyq jáne respýblıkalyq kórkem eńbekter men kásibı sýretshiler jınaǵynyń avtory. «Babalar amanaty» - Qazaqstan Respýblıkasynyń halyqaralyq kásibı sýretshileri men talantty Kórkem eńbek muǵalimderiniń úzdik shyǵarmalarynyń jınaǵy. Sondaı - aq ál-Farabıdiń 1150 jyldyǵyna, Abaı Qunanbaıulynyń 175 jyldyǵyna, Muqaǵalı Maqataevtyń 90 jyldyǵyna, QR Táýelsizdiginiń 30 jyldyǵyna jáne t. b. arnalǵan shyǵarmalar jınaqtary jaryq kórdi.
Kórkem eńbek pánderin oqytatyn respýblıkanyń barlyq óńirlerinen kelgen 800-den astam ustaz, shyǵarmashyl pedagog «Babalar amanaty» jobasynda respýblıkalyq jáne halyqaralyq deńgeıde pedagogıkalyq ónerdi nasıhattaý maqsatynda birikti. Joba músheleri elimizde ótip jatqan mádenıet kúnderine belsendi qatysyp, kórmeler ótkizedi.
Qazirgi ýaqytta elimizdiń pedagogıkalyq qoǵamdastyǵy óskeleń urpaqty ulttyq beıneleý óneriniń qupıalary men qyr-syryna úıretý úshin tynymsyz eńbek etýde, óner arqyly olardy qazirgi zamanǵy kórkemdik baǵyttarmen tanystyrady, estetıkalyq tárbıeni, sulýlyqty durys túsinýdi qalyptastyrady. Qazaqstannyń ulttyq ónerin nasıhattaý boıynsha jumys júrgizýde.
«Ǵasyr tolǵaýy» kórmesinde respýblıkanyń ártúrli qalalarynan (Qaraǵandy, Atyraý, Aqtaý, Shymkent, Mańǵystaý, Pavlodar, Semeı, Óskemen, Aqtóbe, Taldyqorǵan, Qyzylorda, Taraz) qazaq halqynyń ulttyq mádenıetin, tarıhyn, salt-dástúrin, Qazaqstan tabıǵatynyń sulýlyǵyn beıneleıtin pedagogtardyń 100-den astam jumystary usynylǵan.
Kórme 2022 jyldyń 7 sáýirine deıin jalǵasady.