Megapolıs ákimi Baqytjan Saǵyntaev ınjenerlik ınfraqurylymdy damytýdyń onlaın-prezentasıasy barysynda qala kóshelerine syrtqy jaryq jelilerin tartý týraly aıtty, dep habarlaıdy almaty-akshamy.kz
Ákim «Almaty» TA-nyń tikeleı efırinde syrtqy jaryq jelileriniń uzyndyǵy 4815 shaqyrymdy quraıtynyn aıtty. 165 myńnan astam sham bar. 2020 jyly júrgizilgen ınventarızasıa nátıjesinde syrtqy jaryǵy joq 2024 kóshe anyqtaldy. Olardyń kópshiligi Túrksib, Alataý, Naýryzbaı jáne Medeý aýdandarynda kezdesedi.
Ótken jyly 1423 kóshege jaryq jelileri tartylsa, bıyl 601 kóshe jaryqtandyrylady. Sonymen qatar, qosymsha jaryqtandyrý núkteleri bıyl jartylaı jaryqtandyrylǵan 171 kóshege, al kelesi jyly taǵy 895 kóshege ornatylady. Osylaısha, aǵymdaǵy jyldyń sońyna deıin 772 kóshege 18 743 sham ornatylady ári jaryqtandyrylady.
Sondaı-aq, 2020 jyly jalpy uzyndyǵy 103 shaqyrym bolatyn Dostyq, Gagarın, Shalápın dańǵyldary, Saıyn, Momyshuly, Jansúgirov kósheleri, Soltústik aınalma tas joly boıyndaǵy jaryq jelileri rekonstrýksıalandy. Energıa jınaqtaıtyn 5376 sham jáne 3 165 baǵana ornatyldy. Nátıjesinde energıa tutyný ortasha 19,2%-ǵa qysqardy. Eskirgen qurylǵylar bar 48 kóshedegi 7 320 baǵana men 9 105 shamdy modernızasıalaý josparlanýda.
Budan ózge, Alataý, Medeý, Naýryzbaı jáne Túrksib aýdandarynda jańa joldardyń qurylysy kezinde 146 kóshe jaryqtandyrylyp, 2 myńǵa jýyq shamdar ornatylady.
Qalanyń syrtqy jaryq jelilerindegi aqaýlardy qalpyna keltirý úshin «Dıspecherlik ortalyq» táýlik boıyna jumys jumys isteıdi. Ótinimder 300-75-41, 300-75-42 telefondary, sondaı-aq «Open Almaty» jáne áleýmettik jeliler arqyly qabyldanady. Kún saıyn 100-den astam ótinish óńdeledi.
Syrtqy jaryq júıesiniń tıimdiligin arttyrý úshin pasporttaý iske asyrylady ári qaraı sıfrlyq kartany ázirleý josparlanýda. Basqarýdy avtomattandyrý aqaýlardy der kezinde anyqtaýǵa jáne joıýǵa, júıeni modernızasıalaýǵa múmkindik beredi. Jalpy, keler jyly Almaty kóshelerin tolyq jaryqtandyrýǵa qoljetkizý mindeti qoıyldy. Bul qalalyqtarǵa jaıly ortany qamtamasyz etýmen qatar, qoǵamdyq qaýipsizdik deńgeıin arttyrady.