Almaty polıseıleri adam urlaýdyń jolyn kesti.
Qylmys keshe keshkisin qalanyń Almaly aýdanynda oryn alǵan, dep habarlaıdy Almaty-akshamy.kz Polisia.kz-ke silteme jasap.
«JBO jedel kezekshisinen Chevrolet kóligine adamdy kúshtep otyrǵyzý týraly habarlama kelip tústi. Qala boıynsha arnaıy “Perehvat” jospary engizildi. Atalǵan kólik Gogol men Pýshkın kósheleriniń qıylysynda kózge túsken. İzine túsý nátıjesinde kólikti eki ekıpaj Maqataeva men Jetisý kósheleriniń qıylysynda jaýyp tastady. Salonda úsh adam bolǵan, olar ustaldy. Júksalǵyshtan taǵy bir er adam tabyldy, ol atalǵan kóliktiń ıesi ekendigi belgili boldy. Kúdiktiler jedel tergeý tobyna tapsyryldy. Olardyń áreketine quqyqtyq baǵa beriletin bolady», – dedi Almaty qalasy PD JPQB PPP vzvodynyń komandıri Meıirjan Qalkeev.
Ustalǵandardyń aıtýynsha, Chevrolet kóliginiń ıesi olardy iri kólemdegi aqshaǵa aldap ketken. Osylaısha, olar qaryzdy qaıtaryp almaq boldy. Al jábirlenýshi kerisinshe aıtyp otyr, ony qutqarǵan polısıa qyzmetkerlerine alǵysyn bildirdi. Qylmystyq istiń basqa da mán-jaılary QR QPK-niń 201-baby jáne QR Konstıtýsıasynyń normalaryna sáıkes jarıa etýge jatpaıdy.